Петропавл зауытының экс-директоры 100 мың доллар пара алғаны үшін сотталды

Петропавл ауыр машина жасау зауытының бұрынғы бас директоры 100 мың доллар пара алғаны үшін сотталды, деп хабарлады Қаржы мониторингі агенттігі. Атқарушы директоры да сотталды.

2022 жылы кәсіпорын қорғаныс министрлігінен әскери техниканы жөндеуге тапсырыс алды. Оны жүзеге асыру барысында жеке кәсіпкермен жалпы сомасы 283,3 млн.теңгеге қосалқы бөлшектерді жеткізуге шарт жасалды.

"Орындалған жұмыстар актілеріне кедергісіз қол қойғаны және шартты орындау кезінде жалпы қамқорлығы үшін бас директор атқарушы директор арқылы кәсіпкерден 100 мың АҚШ доллары (45 млн теңге) сомасында пара алды", – делінген хабарламада.

Зауыттың бұрынғы бас директоры аса ірі мөлшерде пара алғаны үшін 11 жылға, атқарушы директор - төрт жылға бас бостандығынан айырылды.

Мемлекет кірісіне 40 млн теңгеге пара сомасына сатып алынған пәтер тәркіленді. Қалған 5 млн теңге сотталғандардан тең үлестермен өндірілді.