Песков Зеленскийдің Қазақстанда кездесу өткізу туралы ұсынысына пікір білдірді

Ресей президентінің баспасөз хатшысы Дмитрий Песков Украина президенті Владимир Зеленскийдің Владимир Путинмен келіссөздерді бейтарап алаңда, мысалы Қазақстанда өткізуге дайын екені жөніндегі мәлімдемесіне жауап берді. Бұл туралы ол РБК радиосына берген сұхбатында айтты.

Бұған дейін Зеленский Fox News арнасына берген сұхбатында келіссөздер үшін Түркия, Сауд Арабиясы, Қатар, Австрия, Швейцария сияқты елдердің аталғанын, тіпті Қазақстанда да кездесуге дайын екенін жеткізген еді.

Песковтың сөзінше, Киев түрлі елдерді ұсынғанымен, әуел баста Мәскеу бейтарап деп санамайтын мемлекеттерге назар аударған.

«Әлі күнге дейін Швейцария мен Австрияны бейтарап елдер деп есептейді. Бірақ олар біз үшін қазір бейтарап емес. Бұл – анық жайт», – деді ол.

Сонымен қатар Песков Путиннің бұған дейін Зеленскийді Мәскеуде кездесуге шақырғанын еске салды. Оның айтуынша, Ресей жағы қауіпсіздікке кепілдік берген, бірақ Украина бірден бас тартып, ұсынысты «шынайы емес» деп атаған.

«Путин "кездескің келсе – ертең-ақ кездесемін" дейді. Ал киевтік режим болса, бұл мәселені созбақтай бастайды. Путин келіссөздер тобының жетекшісі Мединский арқылы: келіссөздер жүргізейік, үш жұмыс тобын құрайық дейді. Украина тарапы бұған мүлде жауап берген жоқ, бәрі ауада қалды. Жұмыс топтары құрылмады, ешқандай жауап та түскен жоқ. Ешқандай ықылас байқалмады», – деді Песков.

Песков келіссөздер өтетін орынның аса маңызды емес екенін де атап өтті.

«Кездесу Мәскеуде ме, Қазақстанда ма, әлде Женевада ма – бұл екінші кезектегі мәселе», – деді ол.

Киев тарапы да келіссөздер орнының маңызды емес екенін, бастысы – мазмұны екенін мәлімдеп отыр. Зеленскийдің айтуынша, әңгіме тек Украинаның аумақтық тұтастығы сақталған жағдайда ғана мүмкін.