Перизат Қайраттың туыстары Дубайдағы қымбат пәтерлерді қайдан алған: ҚМА түсіндірді

Қаржылық мониторинг агенттігі сотталған Перизат Қайраттың туыстарына тиесілі делінген Дубайдағы бірнеше пәтер оның қылмыстық жолмен тапқан ақшасына сатып алынған деген болжам расталмағанын мәлімдеді.

Бұған дейін анонимді Telegram арналардың бірінде Перизат Қайраттың туыстарына Дубайда бірнеше пәтер тиесілі екені туралы ақпарат тараған. ҚМА тергеу кезінде бұл адамдардың жылжымайтын мүлікті Қайраттың қылмыстық жолмен тапқан ақшасына сатып алуы мүмкін деген болжамды тексерген.

Агенттік мәліметінше, тергеу барысында қаржылық операциялар жан-жақты зерттеліп, жымқырылған ақшаны заңдастырудың бүкіл тізбегі анықталған. Перизат Қайрат қайырымдылыққа жиналған ақшаны автокөлік пен пәтер сатып алуға, үй жөндеуге және жиһаз алуға, қымбат киім мен әшекей бұйымдарына, бизнес-класпен ұшуға, қымбат қонақүйлерде тұруға, мейрамханалар мен ойын-сауық орындарына жұмсаған.

Алайда ҚМА жарияланымда аталған туыстарымен қандай да бір қаржылық есеп айырысу болғанын анықтамаған.

Агенттіктің мәліметінше, сөз болып отырған жылжымайтын мүлік 2011–2019 жылдары сатып алынған. Бұл – «Biz Birgemiz Qazaqstan 2030» қоры құрылғанға және Перизат Қайрат қылмыстық әрекетке кіріскенге дейінгі кезең.

ҚМА аталған ерлі-зайыптының 20 жылдан астам уақыт бойы жылжымайтын мүлік сатып алып, қайта сатумен айналысып келгенін мәлімдеді. Олар Перизат Қайрат пен оның анасынан бөлек тұрып, кәсібін де дербес жүргізген.

Агенттік Қылмыстық-процестік кодекске сәйкес, мүліктің қылмыстық жолмен алынғанын растайтын дәлел болғанда ғана оған тыйым салынып, кейін тәркіленуі мүмкін екенін түсіндірді. Күдіктімен туыстық байланыстың өзі адамды қылмыстық жауапқа тартуға немесе оның мүлкін тәркілеуге негіз болмайды.