Перизат Қайраттың мүлкі сот санкциясымен тәркіленді

Қаржылық мониторинг агенттігі (ҚМА) қайырымдылық қорының тең құрылтайшысы әрі басшысы Перизат Қайратқа қатысты тергеу ісін жалғастыруда. Оған көктемгі су тасқынынан зардап шеккендер мен Палестина халқына гуманитарлық көмек көрсету мақсатында жиналған 1,7 миллиард теңгеден астам қаржыны жымқырды деген күдік тағылуда.

Соттың санкциясымен күдіктіге тиесілі бірнеше элиталық жылжымайтын мүлік пен қымбат көліктерге тыйым салынды. Атап айтқанда, Астанадағы "Akbulak Riviera", "Highvill Ishim Gold", "Көк Жайлау" тұрғын үй кешендеріндегі пәтерлер, "Sensata Plaza" кеңсесі, "Vela Village" коттедж қалашығындағы зәулім үйлер, сондай-ақ Mercedes-Benz S450, Mercedes-Benz EQE 500, Lexus LX-600 және Haval автокөліктері тәркіленді.

Перизат Қайраттың үйін тінту барысында Cartier, Rolex, Bulgari, Hermes секілді әлемдік брендтердің сәнді киімдері, зергерлік бұйымдары және сөмкелері анықталып, тәркіленді. Бұл заттардың барлығы іс бойынша дәлелдеме ретінде тіркеліп, тергеу материалдарына қосылды.

ҚМА азаматтардан күдікті қаражат пен мүліктің орналасқан жері туралы ақпарат болса, +7 (7172) 70-84-78 және 70-84-79 (21384) нөмірлеріне хабарласуды сұрайды. Тергеу жалғасуда.

Қазақстан Республикасының Қылмыстық-процестік кодексінің 201-бабына сәйкес, өзге ақпарат жария етуге жатпайды.