Перизат Қайратқа қатысты қылмыстық іс бойынша тергеу аяқталды

Перизат Қайратқа қатысты қылмыстық істің тергеуі аяқталды. Қазіргі уақытта тараптар істің материалдарымен танысып жатыр. Бұл туралы Сенат кулуарында Қаржы мониторингі агенттігі төрағасының орынбасары Жеңіс Елемесов хабарлады.

«Перизат Қайратқа қатысты қылмыстық іс бойынша тергеу аяқталды. Қазір іс материалдарымен процеске қатысушылар танысып жатыр. Тергеу кезінде әртүрлі шығын көлемі айтылған еді, соңғы нақты анықталған шығын – 3,5 млрд теңге», – деді Елемесов.

Оның айтуынша, күдікті заңсыз жолмен келген қаражатты Rebel Flowers гүл дүкені арқылы заңдастырып отырған.

«Осылайша, Перизат Қайрат өзін қоғамға бизнес-леди ретінде көрсетіп келген», – деді ол.

Журналистер тәркіленген мүліктер мен әшекейлердің тағдыры туралы сұрағанда, Елемесов бұл мүліктердің тағдырын сот шешетінін атап өтті.

«Тәркіленген мүліктер сот шешімі бойынша зардап шеккендердің шығынын өтеуге немесе мемлекет пайдасына тәркіленуі мүмкін. Соған қарай келесі шаралар қабылданады», – деді агенттік өкілі.

Перизат Қайратпен бірге бұл істе оның анасы да күдікті ретінде танылған.

Айта кетейік, 2024 жылдың қараша айында BizBirgemiz Qazaqstan қайырымдылық қорының басшысы Перизат Қайратқа су тасқынынан зардап шеккендерге жиналған 1,5 млрд теңгені жымқырды деген айып тағылған. Кейінірек оған палестиналықтарға жиналған 200 млн теңгені де ұрлады деген күдік келтірілді.