Перизат Қайрат ісі: тергеу қорытындысы жарияланды

Қаржылық мониторинг агенттігі «Biz Birgemiz Qazaqstan» қоғамдық қорының жетекшісі Перизат Қайратқа қатысты қылмыстық іс аясында анықталған жымқыру деректерін жариялады. Агенттік оның аса ірі көлемдегі алаяқтық пен қылмыстық жолмен алынған қаражатты заңдастыру фактілері бойынша тергеліп жатқанын хабарлады.

3,5 миллиард теңге қалай жымқырылды?

Агенттіктің мәліметінше, Перизат Қайрат 2021–2024 жылдар аралығында бірнеше рет қоғамдық көмек көрсету желеуімен жұрттан ақша жинап отырған. Ол жиналған қаражатты жеке шоттарына және анасының шоттарына аударып, әшекей бұйымдарға, киімге, жиһазға, саяхаттарға және автокөлік жалдау сияқты жеке қажеттіліктерге жұмсаған.

Мәселен, 2024 жылдың 1 сәуірі мен 15 қарашасы аралығында су тасқынынан зардап шеккендерге көмек көрсету мақсатында қор есебіне 2,8 миллиард теңге түскен. Алайда ол қаражат жалған келісімшарттар арқылы 16 жалған жеке кәсіпкерге бөлініп, қайық, етік сияқты тауарлар жеткізілді деген желеумен қолма-қол ақшаға айналдырылған.

Ролекс, гүл салоны, жылжымайтын мүлік

72 миллион теңге анасының шотына аударылып, техника сатып алуға жұмсалды делінген. Бірақ бұл қаржының бір бөлігі 6,9 млн теңгеге Rolex сағатын алуға кеткен.

2024 жылдың қаңтарында Палестина халқына көмек ретінде жиналған қаражаттың бір бөлігіне Перизат Қайрат «Rebel Flowers» гүл дүкенін 23 млн теңгеге сатып алған. Құжатта бұл сома небәрі 2 млн теңге деп көрсетілген.

Агенттік мәліметінше, гүл бизнесі Перизатқа 69 млн теңге пайда әкелген.

Жалпы, жымқырылған қаражатқа төрт көлік, төрт пәтер, екі автотұрақ орны, үй және жер телімі сатып алынған. Сонымен қатар құны 158 млн теңгеге бағаланатын әшекейлер, аяқ киім мен сөмкелер тәркіленді.

Қылмыстық жолмен алынған активтердің жалпы құны 865 млн теңге көлемінде бағаланып, барлығына тыйым салынған.