Перизат Қайрат ісі: Назарбаев мектебінің ата-аналары қайырымдылыққа жіберілген ақшаны қайтаруды сұрайды

Астана қаласындағы Назарбаев Зияткерлік мектебінің ата-аналар комитеті Перизат Қайратқа қатысты қылмыстық іс бойынша жәбірленуші деп танылды. Комитет төрайымы Сәуле Қуандықова сотта куәлік беріп, ата-аналар жинаған қаржының тағдыры туралы айтты.

Оның айтуынша, НЗМ оқушыларының ата-аналары су тасқынынан зардап шеккендерге көмек көрсету мақсатында 901 мың теңге жинап, оны BizBirgemiz Qazaqstan 2030 қоғамдық қорына аударған. Бұл бастаманы Сәуле Қуандықова өзі көтерген.

"Бұл ақша менің жеке қаражатым емес. Мен оны иемденуді мақсат еткен жоқпын. Керісінше, оны қайтадан мектептің қорына аударып, ауыр дертке шалдыққан мұғалімге бергім келеді. Өйткені бұл қаржы діттеген жеріне жетпеген соң, ата-аналардың алдында қатты ұялып жүрмін. Дегенмен бұл менің жеке кінәм емес. Ата-аналар өз еріктерімен қол қойып, келісім берген болатын", – деді Қуандықова.

Қазіргі уақытта сотта қорға ақша аударған өзге жәбірленушілер де жауап беріп жатыр.

Бұған дейін сотта AsarUme қоғамдық қорының жетекшісі Асхат Нұрмашев та куәлік берген еді. Ол ұйымның 293 миллион теңгені Палестина халқына көмек ретінде BizBirgemiz Qazaqstan 2030 қорына аударғанын айтқан. Алайда Перизат Қайрат келісімшарт бойынша міндеттемелерін орындамай, есеп беруді уақытылы жүргізбеген. Кейін қордан алынған есеп құжаты жалған болып шыққан.