Перизат Қайрат ісі бойынша «жоғалған» көлік табылды, алайда оны кім тізгіндейтіні – мемлекеттік құпия

Бағалау құны 79 миллион теңгеден асатын Lexus LX 600 көлігі Перизат Қайрат ісі аясында тәркіленіп, арнайы мемлекеттік органдардың біріне берілген. Бұл туралы Мемлекеттік мүлік және жекешелендіру комитеті Informburo редакциясының сауалына жауап ретінде хабарлады. 

100PKO01 мемлекеттік нөмірлі қара түсті жол талғамайтын көлік 2025 жылдың күзінде саудаға шығарылды. Автокөлік Перизат Қайраттың анасы Ғайни Алашбаеваның ағасының атына рәсімделген. Сарапшылар оның құнын 79 121 985 теңгеге бағалады. Бұған дейін Астана қалалық Мемлекеттік мүлік және жекешелендіру департаменті көлік Қаржылық мониторинг агенттігінің балансында тұрғанын мәлімдеген еді. Ведомствоның мәліметінше, Lexus агенттікке 2025 жылғы 1 желтоқсанда өткізілген. Алайда кейін ҚМА бұл ақпаратты жоққа шығарып, көліктің өз теңгерімінде еместігін хабарлады.       

Осыдан кейін редакция тәркіленген автокөліктің  қайда тұрғанын нақты анықтау үшін комитетке қайта ресми сауал жолдаған болатын. Комитет жауабында көлік бастапқыда ҚМА қарамағына берілгенімен, кейін арнайы мемлекеттік органдардың біріне тапсырылғанын мәлімдеді. Олардың қатарында Ұлттық қауіпсіздік органдары, сыртқы барлау қызметіне жауапты орган және Мемлекеттік күзет қызметі бар. Дегенмен Lexus LX 600 көлігін нақты қай мекеме пайдаланатыны құпия күйінде қалды. Комитет мұны «Мемлекеттік құпиялар туралы» заң талаптарымен түсіндірді. 

«Барлау, қарсы барлау, жедел-іздестіру және өзге де арнайы қызметке қатысты мәліметтер мемлекеттік құпия санатына жатады. Осыған байланысты автокөліктің нақты баланс ұстаушысы туралы ақпарат жарияланбайды», – делінген ресми жауапта.  

Еске салсақ, Перизат Қайрат 10 жылға сотталып, сондай-ақ «Шапағат» медалінен айырылды. Анасы Ғайни Алашбаева қызына көмектескені үшін жеті жылға бас бостандығынан айырылды. Сот үкіміне сәйкес, олардан 50 жәбірленушінің пайдасына жалпы көлемі 1 млрд 582 млн теңге материалдық шығын өндірілетін болды.  Бұдан бөлек, әрқайсысы мемлекеттік баж бен сот шығындарын өтеуге міндеттелген. 

Жарылқасын Шұғыла