Перизат Қайрат ісі аяқталуға жақын

1,7 миллиард теңгеден астам қаражатты жымқырды деп күдікке ілінген Перизат Қайраттың ісі наурыз айында аяқталады. Бұл туралы Қаржылық мониторинг агенттігі төрағасының орынбасары Жеңіс Елемесов мәлімдеді.

"Біз тергеуді аяқтауға жақын қалдық. Наурыз айының соңына дейін тергеуді аяқтап, іспен танысу кезеңіне көшеміз. Бұл процесс қанша уақытқа созылатынын нақты айта алмаймын, себебі ол қылмыстық іске қатысушыларға байланысты. Қазіргі уақытта тергеу материалдары 100-ден астам томды құрайды", – деді ол Мәжіліс кулуарында.

Қазіргі таңда Перизат Қайрат қамауда, сот оны қамауда ұстау мерзімін ұзартты.

Еске салсақ, 2024 жылдың 14 қарашасында BizBirgemiz Qazaqstan қайырымдылық қорының басшысы Перизат Қайратқа 1,5 млрд теңгені жымқырды деген айып тағылғаны белгілі болды. Ол көктемгі су тасқынынан зардап шеккен азаматтарға көмек ретінде халықтан жиналған қаражатты өз қажеттіліктеріне жұмсаған. Тергеу нұсқасына сәйкес, ол жинақталған ақшаны жылжымайтын мүлік пен қымбат заттар сатып алуға пайдаланған.