«Пайызсыз пәтер»: Отбасы банк исламдық ипотеканы енгізеді

Қазақстанда тұрғын үй қаржыландыру нарығында үлкен өзгерістер күтілуде. Отбасы банк елдегі құрылысшылар одағымен және ірі құрылыс компанияларымен кездесіп, шариғат қағидаттарына негізделген ипотекалық өнімдерді іске қосу мәселесін талқылады. Бұл жөнінде "Нарық" хабарлады.

Сұраныс жоғары, балама аз

Зерттеулерге сәйкес, Қазақстандағы мұсылмандардың 55%-ы балама нұсқа болмағандықтан дәстүрлі банк өнімдерін пайдалануға мәжбүр. Сонымен қатар елдегі 2 миллионнан астам азамат баспана жағдайын жақсартуды қажет етеді, бірақ олардың көпшілігі діни сеніміне байланысты пайыздық қарыздан бас тартып отыр.

Пәкістанмен әріптестік: Meezan Bank Limited-пен меморандум

Президент Қасым-Жомарт Тоқаевтың Пәкістанға жасаған ресми сапары аясында Отбасы банк осы елдегі ислам банкингінің көшбасшысы — Meezan Bank Limited-пен ынтымақтастық туралы құжатқа қол қойды. Бұл серіктестік аясында мынадай тетіктер әзірленеді:

• Мурабаха, иджара, мушарака мутанакиса сияқты исламдық қаржы құралдарын енгізу;

• Тәуекелдерді басқару және шариғат талаптарының сақталуын бақылау;

• Исламдық құралдарды тұрғын үй құрылыс жинақ жүйесіне бейімдеу.

Заңға өзгеріс енгізу — басты міндет

Қазіргі таңда банктің ішкі жұмыс тобы исламдық қаржыландыру тұжырымдамасын дайындап қойды. Ендігі кезекте — «Тұрғын үй құрылыс жинақтары туралы» заңға өзгерістер енгізу. Бұл Отбасы банкке исламдық банк операцияларын жүргізуге құқықтық негіз береді.

«Біз күн сайын діни себептерге байланысты дәстүрлі ипотеканы пайдалана алмайтын азаматтардан өтініштер аламыз. Исламдық ипотека олар үшін қолжетімді шешім болмақ. Бұл — қаржыландыруға тең қолжетімділікті қамтамасыз ету мәселесі», — деп атап өтті Отбасы банк басқарма төрайымы Ләззат Ибрагимова.

Бұған дейін банк қызметкерлері Малайзияның CSQ Law ұйымымен бірлесіп, шариғат талаптарына сәйкес қаржылық құқық бойынша арнайы оқудан өткен болатын.