Павлодарлықтар қоқысты сұрыптағаны үшін коммуналдық қызметке азырақ төлеуі мүмкін

Павлодар облысының әкімі Асайын Байханов өңірде қоқысты сұрыптап жинау мәселесін кезең-кезеңімен шешу жоспарланып отырғанын мәлімдеді. Бұл туралы ол «90 минут әкіммен» бағдарламасында айтты. Бағдарламада тұрғындардың бірі қалада қоқыс сұрыптайтын контейнерлер қашан қойылатынын сұраған еді.

"Қалада қоқыс сұрыптауға арналған контейнерлер орнату мәселені шешпейді. Ең алдымен, қоқысты үй жағдайында сұрыптауды үйрену қажет. Бірақ бұл үшін экологиялық сананы қалыптастыру керек. Қазіргі таңда көпшілігі барлық қоқысты бір шелекке салады, ал үй ішінде 4 бөлек контейнер болуы қажет. Әзірге бізде ондай мәдениет жоқ. Сондықтан бұл жұмысты алдымен ірі кәсіпорындар мен қоғамдық тамақтану орындарынан бастау керек", – деді облыс әкімі.

Облыс жыл сайын шамамен 150 мың тонна қоқыс шығарады. Әкімнің айтуынша, қоқыс сұрыптайтын зауыттың құрылысы бұл мәселені шешуге ықпал етеді. Жоспар бойынша, бұл зауыт биологиялық қалдықтардан тыңайтқыштар жасап, қоқыстан металл, әйнек және қағаз бөліп алуға мүмкіндік береді.

Әкімнің айтуынша, келесі жылдан бастап өңірдегі ірі кәсіпорындар мен коммерциялық ұйымдар қоқысты бөлек жинау процесіне көшеді. Әуелі металлургиялық зауыттар, кейін қоғамдық тамақтану орындары, супермаркеттер мен дүкендер сұрыптауды бастайды. Осыдан кейін тұрғындар арасында қоқысты бөлек жинау мәдениетін енгізу қолға алынады.

Сондай-ақ әкім қоқысты дұрыс сұрыптаған павлодарлықтарды ынталандыру мүмкіндігін қарастырып жатқанын айтты. Мысалы, қоқысты бөлек жинағандар үшін қоқыс шығару ақысына жеңілдіктер ұсынылуы мүмкін.