Павлодардағы заңбұзушылық: Өлілерді емдеп, ерлерді гинекологқа жазған кімдер?

Павлодар қаласының прокуратурасы халыққа медициналық көмек көрсетуге бөлінген бюджет қаражатының жұмсалуына кешенді тексеру жүргізді. «Әлеуметтік медициналық сақтандыру қоры» КЕАҚ активтерінің пайдаланылуын қадағалау барысында қызмет көрсету фактілерін бұрмалаудың өрескел жағдайлары анықталды.

Прокуратураның ресми мәліметінше, бірқатар медициналық мекемелерде іс жүзінде орындалмаған қызметтер үшін мемлекеттен қаржы алып отырған. Атап айтқанда, невропатолог, кардиолог, хирург және психолог сияқты тар бейінді мамандардың қабылдаулары қайтыс болған адамдардың атына толтырылған. Сонымен қатар акушер-гинеколог дәрігердің консультациялары құжат жүзінде ер адамдарға көрсетілгені белгілі болды.

Қадағалау органы өкілдері:

 «Тексеріс барысында емдеу қызметтерін қайталау арқылы бюджеттен қосарланған төлем алу және медициналық қызмет көрсетуге тиісті сертификаты мен рұқсаты жоқ тұлғаларды жұмысқа тарту фактілері расталды», – деп мәлімдеді.

Құзырлы органның хабарлауынша, заңбұзушылықтарды жою бағытында атқарылған шаралардың нәтижесінде мемлекетке келтірілген 100 млн теңгеден астам соманың өтелуі қамтамасыз етілді. Сонымен қатар қазіргі уақытта сот органдарында екі қылмыстық іс қаралуда. Атап айтқанда:

• Медицина саласында заңсыз кәсіпкерлікпен айналысу арқылы мемлекеттің 62 млн теңге қаражатын жымқыру;

• Мемлекетке 41 млн теңге көлемінде материалдық залал келтіру деректері бойынша тергеу амалдары жүргізілуде.

Бүгінгі таңда прокуратура актілері негізінде кінәлі тұлғаларды заңнамада белгіленген тәртіппен жауапкершілікке тарту және рұқсат беру құжаттарын заңдастыру жұмыстары жалғасып жатыр.