Павлодарда шетелдік өзін қандас ретінде таныстырып, заңсыз әлеуметтік төлем алған

Павлодар облысында шетелдік азаматтың өзін қандас ретінде көрсетіп, мемлекеттік әлеуметтік төлемдерді заңсыз алғаны анықталды. Бұл туралы Павлодар облысының прокуратурасы хабарлады.

Прокуратура мәліметінше, Ауғанстан Республикасының азаматы шығу тегіне қатысты жалған құжаттар ұсынып, мемлекеттен әлеуметтік төлемдер алған. Кейін ол бұл қаражатқа 20 млн теңгеге пәтер сатып алған.

Анықталған дерек бойынша қылмыстық іс қозғалды. Прокуратураның талап арызы негізінде сот аталған тұрғын үйді мемлекет кірісіне тәркілеу туралы шешім қабылдаған.

Қадағалау органының хабарлауынша, сот шешімі әзірге заңды күшіне енген жоқ.