Павлодарда полиция бөлімінде ер адам қайтыс болды: туыстары мән-жайды анықтауды талап етті

Павлодар облысында полиция қызметкерлері ұстап, бөлімге жеткізген 37 жастағы ер адам қайтыс болды. Оқиға 11 тамызда Екібастұзда болған, деп хабарлады Qumash Telegram арнасы.

Марқұмның әпкесінің айтуынша, ер адам Солнечный кентінде үйінің маңында ұсталған. Сол кезде жанында інісі болған. Туыстарының сөзінше, шамамен жарты сағаттан кейін кезекші бөлімнен ер адамның анасына хабарласып, полиция бөліміне келуін сұраған. Ол жерге келгенде ұлының қайтыс болғанын көрген.

Отбасы полиция өкілдері ер адамның өлімін өзіне қол жұмсау жағдайы ретінде түсіндіріп отырғанын айтады. Туыстары оның қандай себеппен ұсталғанын және арнайы бөлмеге қамау алдында тексерілген-тексерілмегенін анықтауды талап етіп отыр.

Павлодар облысының Полиция департаменті 11 тамызда Екібастұзда мас күйдегі ер адамға қатысты шақырту түскенін хабарлады. Ведомствоның мәліметінше, ол үй ауласында қоғамдық тәртіпті бұзып, әйел адамға қоқан-лоқы көрсеткен.

Оқиға орнына келген полицейлер ер адамды ұстап, бөлімге жеткізген. Полиция оның бұған дейін сотталғанын және әкімшілік жауапқа тартылғанын да мәлімдеді.

«Құқық бұзушы арнайы бөлмеге орналастырылды. Біраз уақыттан кейін ол ес-түссіз күйде табылды. Медициналық көмек көрсетілгеніне қарамастан, ер адам қайтыс болды», – делінген полиция хабарламасында.

Полиция департаменті оқиғаға қатысты бейнежазбалардың алынғанын хабарлады. Ер адамның нақты неден қайтыс болғаны әзірге айтылған жоқ.