Павлодар облысында дауылдан кейін төтенше жағдай режимі енгізілді

Павлодар, Ақсу, Екібастұз қалаларында, сондай-ақ Баянауыл, Павлодар, Май аудандарында төтенше жағдай режимі жарияланды. Бұл шешімді облыстық төтенше жағдайлар жөніндегі комиссия қабылдады.

Әкімдік таратқан ресми мәліметке сәйкес, 20–30 маусым аралығында табиғи апаттан зардап шеккен азаматтардан өтініштер қабылданады. Қазіргі уақытта арнайы комиссиялар елді мекендердегі зақым келген нысандарды аралап, залал көлемін бағалап жатыр.

Зардап шеккендерге әлеуметтік көмек қарастырылған. Дауыл салдарынан зардап шеккен жеке үйлердің тұрғындарына 100 айлық есептік көрсеткіш көлемінде (393 200 теңге) біржолғы әлеуметтік көмек беріледі.

Көмек алу үшін мына құжаттар қажет:

• ТЖБ анықтамасы (6 айға жарамды);

• Мүлікке құқықты растайтын құжаттар;

• Банктік шот туралы хабарлама;

• Жеке куәлік (түпнұсқа және көшірме).

Өтініштер мен кеңес алу мекенжайлары:

• Павлодар: Кривенко көшесі, 25 – Open Pavlodar фронт-кеңсесі, №3 үстел. Байланыс телефондары: 109, 112, 32-36-92;

• Ақсу: Пушкин көшесі, 70/2;

• Екібастұз: Энергетиктер көшесі, 62. Тел.: 34-77-04, WhatsApp: 8 775 710 0291;

• Баянауыл ауданы: Қ. Сәтбаев көшесі, 45, Азаматтарды қабылдау орталығы. Тел.: 8 777 939 3500, 8 771 216 8242, 8 718 409 1203;

• Павлодар ауданы: Қайырбаев көшесі, 32. Тел.: 8 705 152 7967, 32-20-89;

• Май ауданы: Көктөбе ауылы, Абылай хан көшесі, 34. Тел.: 8 747 370 8518.

Еске сала кетейік, 19 маусым күні Павлодар облысында желдің екпіні секундына 43 метрге дейін жеткен. Табиғи апат салдарынан 16 адам жарақат алды, оның ішінде үш бала бар. Ақсу қаласында 1968 жылы туған әйел адамның қайтыс болғаны хабарланды.