Павел Дуров Telegram-ның Ресейде кеңсе ашатынын жоққа шығарды

Telegram мессенджерінің негізін қалаушы әрі иесі Павел Дуров мессенджерге қатысты кейбір БАҚ-та жарияланған ақпаратты жоққа шығарып, бұл әрекеттерді Telegram-ды қаралау үшін әдейі ұйымдастырылған ақпараттық шабуыл деп атады. Бұл туралы кәсіпкер өзінің Telegram-дағы арнасында жазды.

"Мүмкін, бұл журналистердің қарапайым қателігі емес, Telegram-ды беделден айыруға бағытталған әдейі ұйымдастырылған науқан шығар", – деп жазды Дуров.

Бұған дейін 17 шілдеде бірқатар ресейлік БАҚ Telegram компаниясы Ресейде ресми өкілдік ашуға ниетті екені жайлы хабар таратқан болатын. Атап айтқанда, Hi-Tech Mail ресурсы Роскомнадзордың сайтында жарияланған тізілімге сілтеме жасап, мессенджер Ресей заңнамасына сәйкес ел аумағында заңды тұлға немесе өкілдік ашудың "келісу кезеңінде" екенін жазған.

Бұл талап – 2022 жылдан бері күшіне енген Ресейдің "шетелдік IT-компанияларды елге тіркеу туралы" заңының бір бөлігі. Telegram компаниясы Британдық Виргин аралдарында тіркелгендіктен, бұл талапқа бағынуы тиіс. Роскомнадзор Telegram осыған дейін талап етілген үш міндеттің екеуін – сайтқа арнайы форма орналастыру мен жеке кабинет ашуды орындағанын атап өтті.

Алайда "Медуза" басылымының жазуынша, 2024 жылдың тамызына дейін Telegram бұл талаптардың ешқайсысын орындамаған. Барлық әрекет кейінірек басталған, алайда нақты уақыты белгісіз. 2025 жылдың көктемінен бастап Ресей билігі мессенджердің жұмысын шектеу туралы тағы да ескерту жасай бастады. Бұл елде "ұлттық мессенджер" жасау әрекеттері аясында орын алды.

Павел Дуров бұған дейін де Ресей билігімен және арнайы қызметтерімен ешқандай байланысы жоқ екенін бірнеше рет мәлімдеген. Оның өкілдері кәсіпкердің 2014 жылдан бері Ресейге аяқ баспағанын және оның ресейлік төлқұжатының мерзімі өтіп кеткенін айтқан.

Алайда "Важные истории" басылымы ФСБ мәліметтер базасына сүйене отырып, Дуров эмиграциядан кейін кем дегенде 50 рет Ресейге қайтып барғанын анықтаған. Оның ішінде 2020 жылы мессенджерге қойылған бұғатты алып тастау мәселесі қаралған кезде де елде болған. Ол шешім шыққаннан кейін келесі күні Санкт-Петербургтен ұшып кеткен.