Пәтердің ішкі құрылымын өзгерту қымбатқа түсуі мүмкін: қандай жағдайда айыппұл салынады?

Көпқабатты үйдегі пәтерді қайта жоспарлау қымбатқа түсуі мүмкін. Tengri Life әлеуметтік желілерде талқыланған Астанадағы пәтерге қатысты қандай жауапкершілік бар екенін және заң бойынша қандай айыппұлдар қарастырылғанын анықтады.

Заң бойынша қандай айыппұлдар қарастырылған?

Астана қаласының архитектура басқармасы хабарлағандай, тірек қабырғаларды заңсыз қайта жоспарлау ӘҚБтК-нің 322-бабы бойынша әкімшілік жауапкершілікке әкеледі. Сонымен қатар  пәтер иесіне заңбұзушылықтарды жою туралы нұсқама беріледі.

Рұқсатсыз қайта жоспарлау немесе қайта жабдықтау үшін айыппұл мөлшері:

• жеке тұлғаларға — 30 АЕК (117 960 теңге);

• лауазымды тұлғаларға, шағын бизнес пен ҮЕҰ-ға — 90 АЕК (353 880 теңге);

• орта бизнеске — 150 АЕК (589 800 теңге);

• ірі бизнеске — 300 АЕК (1 179 600 теңге).

Егер жасалған әрекеттер ғимараттың құлау қаупін тудырса:

• жеке тұлғаларға — 80 АЕК (314 560 теңге);

• лауазымды тұлғаларға, шағын бизнес пен ҮЕҰ-ға — 180 АЕК (707 760 теңге);

• орта бизнеске — 250 АЕК (983 000 теңге);

• ірі бизнеске — 500 АЕК (1 966 000 теңге).

Қараша айының соңында Threads желісінде жарияланған ерекше хабарлама көпшіліктің назарын аударды: Астанадағы бір бөлмелі пәтерде ас бөлме әйнектелген балконға көшірілген. Онда плита, раковина және шкафтар орнатылған. Бұл сурет желі қолданушыларын таңғалдырды ,олар мұндай шешімнің заңдылығын сұрады.

«Қазіргі уақытта көрсетілген пәтер бойынша жоспардан тыс тексеріс жүргізілген жоқ, себебі ресми өтініш түскен жоқ. Егер өтініш түссе, басқарма тексеріс тағайындап, оның нәтижесіне сәйкес шешім қабылдайды», — деп мәлімдеді ведомство.