Парламенттік республикаға айналу мәселесі күн тәртібінде тұрған жоқ – Тоқаев

Президент Қасым-Жомарт Тоқаев конституциялық қадағалау органдарының халықаралық форумына қатысушылармен кездесу барысында Қазақстандағы саяси жүйенің дамуына қатысты пікір білдірді.

Мемлекет басшысы алдағы реформалардың мақсаты – елдегі институттардың жұмысын жетілдіру екенін атап өтті.

– Бұл реформа саяси жүйеміздің институционалды негізін нығайтуға бағытталған. Парламенттік республикаға айналу мәселесі күн тәртібінде тұрған жоқ. «Күшті Президент – ықпалды Парламент – есеп беретін Үкімет» қағидаты сақталады, – деді Қасым-Жомарт Тоқаев.

Президенттің айтуынша, жалпыұлттық референдум өткізу туралы бастама да Қазақстандағы демократиялық қағидаттардың дамып келе жатқанын көрсетеді.

– Еліміздің болашағына қатысты шешімдерді бірлесіп қабылдау қажет. Бұған дейінгі реформалар мен АЭС құрылысына қатысты референдумда да осы ұстанымнан айныған жоқпыз, – деді Мемлекет басшысы.

Кездесу барысында Тоқаев Қазақстанды технологиялық тұрғыдан озық елге айналдыру басты мақсат екенін айтты. Оның сөзінше, жасанды интеллектіні қолдану аясын кеңейту және жаппай цифрландыру жаңа ұлттық идеяға айналады.

Шетелдік қонақтар да Қазақстандағы саяси өзгерістерге оң бағасын берді. Венеция комиссиясының президенті Клэр Бази Малори еліміздің заң үстемдігін арттыруға бағытталған реформаларын атап өтсе, БАӘ және Моңғолия өкілдері Қазақстанмен стратегиялық әріптестікке жоғары баға берді.

Кездесу соңында Мемлекет басшысы Қазақстанның шетелдік конституциялық қадағалау органдарымен ынтымақтастықты жалғастыруға дайын екенін айтты.