«Парламентте менен артық қазақ тілі үшін күрескен ешкім жоқ» – Қазыбек Иса

Мәжіліс депутаты, «Ақ жол» демократиялық партиясы фракциясының мүшесі Қазыбек Иса Жаңа Конституция жобасы талқыланған жиында мемлекеттік тіл мәселесін Парламент қабырғасында жүйелі түрде көтеріп келе жатқанын айтты.

Депутаттың айтуынша, қазақ тіліне қатысты бастамалар әрдайым бірдей қолдау таба бермеген.

«Парламентте  Мемлекеттік тіл туралы заң қабылдау жайлы депутаттық сауал жасағанымда бір ауыз қолдау жасай алмай, қайта қазақ тіліне қарсы шыққандар қазір аяқ астынан тіл жайлы “ақыл” айтқыштарға айналыпты», – деді ол.

Қазыбек Иса соңғы жылдары Мәжілістегі тілдік орта айтарлықтай өзгергенін атап өтті. Бүгінде депутаттардың басым бөлігі қазақ тілінде сөйлейді, сондай-ақ өзге этнос өкілдерінің де мемлекеттік тілді меңгеруге бет бұрғаны байқалады.

Ол 2024 жылы «Ақ жол» партиясының бастамасымен Қазақстан азаматтығын алу үшін қазақ тілінен емтихан тапсыру талабын енгізу маңызды қадам болғанын айтты. Депутаттың пікірінше, бұл норма тіл мәртебесін нығайтып қана қоймай, ұлттық қауіпсіздікке де қызмет етеді.

Сонымен бірге Қазыбек Иса мемлекеттік қызметке қабылдауда қазақ тілін білу талабын күшейтіп, тілдік тестілеу жүйесін жетілдіру қажеттігін көтерді.

"Қазіргі геосаяси ахуалдың күрделігі сондай: тіл мәселесі қауіпсіздік факторына айналды. Бүгінгі әлемде ол ішкі саясаттан  шығып, геосаяси  құрал мен ықпал болып тұр. Сондықтан, өкінішке орай тілге қатысты кез келген қатаң шешім сыртқы күштерге ақпараттық және саяси манипуляция жасауға дайын аргумент болмақ. Тіл мәселесінің байыптылығы  тұрақтылықты сақтайтын механизм қызметін атқаруда.Тәуелсіздікті алу қандай қиын болса, Тәуелсіздікті сақтап қалу да сондай қиын дейді данышпандар.  Сондықтан бұл мәселеге біз байсалды байыппен, салмақты сабырмен қарауымыз керек", – деп ойын бөлісті депутат.

Депутат Жаңа Конституция жобасында мемлекеттік тілдің, ұлттық құндылықтардың және құқықтық егемендіктің нақты көрініс табуын қолдайтынын айтып, бұл құжатты ел болашағы үшін маңызды қадам деп бағалады.