Парламент таратылса да, депутаттарға жалақы төлене бере ме?

Қазақстан Парламенті таратылған жағдайда Мәжіліс пен Сенат депутаттарына үш ай бойы орташа айлық жалақысы көлемінде төлем жасалады. Бұл туралы Еңбек және халықты әлеуметтік қорғау министрлігінің баспасөз қызметі «Курсивтің» сауалына берген жауабында хабарлады.

Министрліктің мәліметінше, депутат қызметінен босатылған күннен бастап жұмысқа орналасқанға дейін немесе зейнет жасына жеткенге дейін ай сайын жәрдемақы төленеді. Алайда бұл төлем үш айдан аспайды.

– Депутатқа оның орташа айлық жалақысы мөлшерінде ай сайын жәрдемақы төленеді, бірақ ол өкілеттігі тоқтатылған күннен бастап үш айдан аспауы тиіс, – деп түсіндірді ведомство.

Аталған норма «Қазақстан Республикасының Парламенті және оның депутаттарының мәртебесі туралы» Конституциялық заңның 30-бабы 5-1-тармағымен реттеледі. Заңнамада депутаттарға өзге төлем түрлері қарастырылмаған.

Жаңа Конституция жобасына сәйкес, Қазақстан бір палаталы парламенттік жүйеге көшеді. Жаңа Парламент – Құрылтай құрамына партиялық тізім бойынша 145 депутат сайланады. Қалған депутаттар өкілеттігін тоқтатады. Құрылтай 2026 жылғы 1 қыркүйекке дейін жұмысын бастауы тиіс. Ал қазіргі Парламент құрамы 1 шілдеге дейін қызметін жалғастырады.