Парижде ПСЖ жеңісінен кейін 700-ден астам адам тұтқындалды: қаза тапқандар мен жараланғандар бар

Будапештте өткен Чемпиондар лигасының финалдық ойынында франциялық ПСЖ клубы лондондық «Арсеналды» жеңгеннен кейін, Францияның бірнеше қаласында футбол жанкүйерлері мен тәртіп сақшылары арасында ірі қақтығыстар орын алды. Жаппай тәртіпсіздіктер салдарынан жүздеген адам қамауға алынды.

Франция Ішкі істер министрі Лоран Нуньестің хабарлауынша, тек ел астанасында 480-нен астам адам тұтқындалды, ал жалпы ел бойынша ұсталғандардың саны 780 адамнан асады. Ресми мәліметтерге сүйенсек, қақтығыс кезінде 1 адам қаза тауып, 219 адам жарақат алған. Зардап шеккендердің арасында құқық қорғау органдарының 57 қызметкері бар.

Елисей алаңына финалдық ойынды тамашалау үшін 20 мыңға жуық көрермен жиналған еді. Ол жерде де жанкүйерлер көліктер мен велосипедтерді өртей бастады. Тәртіп сақшылары ұсталғандардан жүзден астам пиротехникалық құралдар мен 24 сигналдық ракета тәркіледі. Мұндай вандализм оқиғалары тек Парижбен шектелмей, елдің тағы 15 қаласында, соның ішінде Ренн, Страсбург, Клермон-Ферран және Гренобльде тіркелді.

Спорт кешенінің маңында орналасқан дәмханалар мен наубайханалар бүлінді.  Бұған қоса, жүздеген жанкүйер Париждің айналма тас жолын бұғаттап тастауы салдарынан үлкен кептелістер мен жол апаттары орын алды. Салдарынан, 24 жастағы мотоцикл жүргізушісі қаза тапты.

Еске сала кетейік, Чемпиондар лигасының финалдық ойыны Будапештте өтті. Матчтың негізгі уақыты тең аяқталып, жеңімпаз пенальти сериясында анықталды. Онда ПСЖ футболшылары 4:3 есебімен басым түсті.