«Парацетамол аутизмге әкелуі мүмкін» – Трамптың сөзіне ДДСҰ жауап берді

Дүниежүзілік денсаулық сақтау ұйымы (ДДСҰ) жүкті әйелдердің парацетамол қабылдауы мен баланың аутизмге шалдығуы арасындағы ықтимал байланысқа қатысты түсініктеме жасады.

АҚШ президенті Дональд Трамп жуырда жүкті әйелдерге Tylenol (негізгі белсенді заты – парацетамол) препаратын қабылдамауға шақырып, бұл мәселе бойынша дәрігерлерге ресми нұсқаулық берілетінін мәлімдеген еді.

Алайда ДДСҰ қазіргі таңда мұндай байланысты растайтын ғылыми тұрғыда дәлелді деректер жоқ екенін атап өтті.

🔹 Ұйым мәліметінше, аутизм спектріндегі бұзылыстар – ми дамуының ерекшелігіне байланысты пайда болатын кең таралған жағдайлар. Әлемде шамамен 62 млн адамда (әрбір 127 адамның бірінде) осындай диагноз қойылған. Соңғы жылдары бұл ауру жиірек анықталып, оған көбірек көңіл бөлінгенімен, нақты себебі әлі де белгісіз және түрлі факторлармен байланысты болуы мүмкін.

🔹 ДДСҰ соңғы он жылдықта парацетамол мен аутизм арасындағы байланысты зерттеуге арналған көптеген халықаралық зерттеулер жүргізілгенін, бірақ әзірге мұндай байланыс ғылыми тұрғыда дәлелденбегенін хабарлады.

«Жүкті әйелдерге дәрігердің нұсқауын орындап, тек маман тағайындаған препараттарды қабылдау қажет. Әсіресе жүктіліктің алғашқы үш айында кез келген дәріні сақтықпен қабылдау керек», – делінген ұйым хабарламасында.

Сонымен қатар ДДСҰ вакцинацияға қатысты да пікір білдірді. Ұйым балалардағы аутизмнің себебі вакцина еместігін, бұл жөнінде 1999 жылдан бері жүргізілген ірі халықаралық зерттеулер біржақты дәлелдегенін еске салды. Вакциналар, оның ішінде құрамында тиомерсал немесе алюминий бар түрлері де аутизм немесе басқа да даму бұзылыстарын туындатпайды.