Пара беруге уәде бергендер қылмыстық жауапкершілікке тартылуы мүмкін

Қазақстанда пара беру немесе уәде ету үшін қылмыстық жауапкершілік енгізу қарастырылып жатыр. Бұл норма «Сыбайлас жемқорлыққа қарсы іс-қимыл мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасына енгізілген. Аталған құжат сәрсенбі күні Мәжілісте бірінші оқылымда қарады.

«Пара беру немесе уәде ету үшін қылмыстық жауапкершілік енгізу – соңғы 16 жыл бойы талқыланып келе жатқан маңызды бастама. Пара туралы келісімді аяқталған қылмыс деп тану алдын алу шараларын күшейтіп, сыбайлас жемқорлық әрекеттердің алдын алуға мүмкіндік береді», – деді Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов.

Заң жобасына сәйкес, Қылмыстық кодекске 367-1-бап «Пара ұсыну немесе уәде беру» енгізіледі. Осы баптың түсіндірмесінде пара ұсыну деп – жазбаша, ауызша немесе электрондық форматта пара беруді ұсынуды білдіретін хабарлама түсініледі. Ал пара беру уәдесі – пара беру уақыты, орны және тәсілі көрсетілген хабарламаны білдіреді.

Бұл бап бойынша 1 000 АЕК-ке дейін айыппұл, сол көлемде түзету жұмыстары, 400 сағатқа дейін қоғамдық жұмыстар немесе бір жылға дейін бас бостандығын шектеу жазасы қарастырылған. Сонымен қатар өмір бойына белгілі бір лауазымдарды атқару немесе қызмет түрімен айналысу құқығынан айыру қарастырылған.

Егер пара сомасы 2 АЕК-тен аспаса, пара талап етілген жағдайда немесе азамат құқық қорғау органдарына өз еркімен хабарлап, пара беруден бас тартса, қылмыстық жауапкершілікке тартылмайды.