Қасым-Жомарт Тоқаев: Қазақ тілінің болашағы жарқын

Президент Қасым-Жомарт Тоқаев жаңа Конституцияға байланысты орыс тілі қысым көріп жатыр деген пікірлерді сынға алды. Бұл туралы ол барлық деңгейдегі мәслихат депутаттарының ІІІ республикалық форумында айтты.

Мемлекет басшысы жаңа Конституция жобасында жекелеген аумақтар мен «қарқынды дамитын қалалар» үшін арнайы құқықтық режим енгізу ұсынылып отырғанын атап өтті. Оның айтуынша, осы нормаға байланысты елдің аумақтық тұтастығына қауіп төнуі мүмкін деген қауесеттер тараған.

Президент мұндай айыптауларды әдетте әлемдік тәжірибеден бейхабар әрі заңнамалық сауаты төмен адамдар айтатынын жеткізді. Сонымен қатар ол жаңа Конституция жобасында орыс тілінің мәртебесі төмендетіліп жатыр деген пікірлерге де тоқталды.

«Бұл жайында жазылған мақалаларды оқудың өзі қызық. Стилистикалық және грамматикалық қателерден аяқ алып жүре алмайсың. Жарияланым авторлары орыс тілі үшін қам жейді, бірақ өздері оны дұрыс меңгермеген», – деді Қасым-Жомарт Тоқаев.

Президенттің айтуынша, жаңа Конституция мәтіні ресми құжат ретінде қазақ және орыс тілдерінде бірдей заңды күшке ие түрде жарияланады. Оның пікірінше, бұл жағдайдың өзі мәселенің мәнін түсіндіруге жеткілікті.

Сонымен қатар мемлекет басшысы қазақ тілінің мәртебесі төмендеді деген пікірлерге де жауап берді. Оның айтуынша, мұндай байбалам салудың қажеті жоқ.

«Жаңа Конституция жобасында “Қазақстан Республикасының мемлекеттік тілі – қазақ тілі” деп нақты жазылған», — деді Президент.

Тоқаевтың сөзінше, қазақ тілі тек көркем әдебиетте ғана емес, елдің қоғамдық-саяси өмірінің барлық саласында кеңінен қолданылады. Ол жастар арасында қазақша сөйлеу сәнге айналғанын атап өтті.

«Басқаша айтқанда, қазақ тілінің болашағы жарқын», — деді мемлекет басшысы.

Президент кейбір адамдар тіл мәселесін саяси құрал ретінде пайдаланатынын айтты. Оның пікірінше, қазақ жастары жаңашылдыққа тез бейімделеді және қазақ, орыс тілдерімен қатар бірнеше тілді еркін меңгере алады.