Өзбекстанның тарихи голы тіркелді, бірақ жеңіс бұйырмады

17 маусым күні Мехикодағы әйгілі «Ацтека» стадионында өткен кездесуде Өзбекстан құрамасы футболдан әлем чемпионатындағы алғашқы ойынын өткізді. К тобындағы матчта олар Колумбия құрамасына 1:3 есебімен жол берді.

Кездесудегі есеп 40-минутта ашылды. Луис Диастың пасынан кейін қорғаушы Даниэль Муньос бірден соққы жасап, Колумбияны алға шығарды.

Екінші таймда Өзбекстан құрамасының бапкерлер штабы құрамға өзгеріс енгізіп, алаңға Фаррух Сайфиев пен Достонбек Хамдамовты шығарды. Бұл ауысулар ойынға серпін беріп, 60-минутта өзбек футболшылары тарихи жетістікке қол жеткізді. Аббосбек Файзуллаев қайтарылған допқа бірінші жетіп, оны қақпаға дәл бағыттады. Осылайша ол Өзбекстан құрамасының әлем чемпионаттары тарихындағы алғашқы голының авторы атанды. Алайда есеп тең болғанымен, бұл ұзаққа созылмады. Бес минуттан кейін колумбиялықтар қарсы шабуылды сәтті ұйымдастырып, Луис Диастың соққысынан кейін қақпашы Өткір Юсупов тойтарған доп бәрібір қақпа сызығынан асып түсті.

Матчтың соңына қарай Колумбия басымдығын арттыра түсті. Кучо Эрнандестің пасынан кейін Хаминтон Кампас әуедегі тартыста жеңіске жетіп, баспен дәл соққы жасап, есепті 3:1-ге жеткізді. Қосымша уақытта Өзбекстан құрамасы есеп айырмасын қысқартуға мүмкіндік алды. Бехруз Каримов алыстан күшті соққы жасағанымен, доп көлденең тірекке тиіп қайтты.

Бірінші тур қорытындысы бойынша Колумбия үш ұпаймен К тобының көшін бастады. Португалия мен Конго Демократиялық Республикасы тең түсіп, бір-бір ұпайдан еншіледі. Ал Өзбекстан құрамасы әзірге турнир кестесінің соңғы сатысында тұр. Өзбекстан келесі ойынын 23 маусым күні Португалия құрамасына қарсы өткізеді.