Өзбекстан метросында ер адамдарға жармасып пранк түсірген қазақстандық блогерге іс қозғалды

Қытайдағы даулы видеоларымен танылған қазақстандық блогер тағы да жұрт назарында. Бұл жолы ол Өзбекстан астанасы Ташкентте түсірген әрекеттерімен елдің наразылығын туғызды.

Әлеуметтік желіде тараған бейнежазбада блогер қыз метро жолаушыларының қолынан, аяғынан ұстап, оларды видеоға түсіріп жүргені байқалады. Бұл әрекет Өзбекстан азаматтарының ашу-ызасын тудырып, қызу талқыланған.

Алматы қалалық Полиция департаменті блогердің жеке басы анықталғанын және оның шетелде қоғамдық орындарда әдепсіз әрекет жасағанын растады.

"Тергеу барысында азаматша А. Ташкент метросында жолаушыларға қасақана тиіскен, бұл сәттерді видеоға түсіріп, өз парақшасында жариялағаны анықталды. Осы факті бойынша ұсақ бұзақылық бабымен әкімшілік іс қозғалды. Материалдар сотқа жолданды", – делінген Полиция департаментінің хабарламасында.

Айта кетейік, бұған дейін дәл осы блогер Қытайда да желіде дау тудырған болатын. Ол сол елдің метросында түсірген видеоларында бейтаныс адамдардың қолынан ұстаған және жалған ұрлық көріністерін ұйымдастырған. Сол кезде қазақстандық полицейлер онымен профилактикалық әңгіме жүргізіп, ескерту жасаған еді.