Өзбекстан Қазақстанға суару маусымында 922 миллион текше метр су жіберетін болды

Биылғы суару маусымында Өзбекстан Қазақстанға «Достық» каналы арқылы 922 миллион текше метр су жіберетін болды. Бұл туралы Су ресурстары және ирригация министрлігі хабарлады. 

Естеріңізде болса, былтыр дәл осы «Достық» каналы арқылы келетін су азайып кетіп, Жетісай мен Мақтаарал егістіктері қаталап қалған еді. Аталған мәселеге Сенат Төрағасы Мәулен Әшімбаевтың өзі арнайы тоқталып, Экология вице-министріне нақты тапсырмалар берген болатын. Ал Экология вице-министрі Галидулла Азидуллин алда осы мәселе бойынша үлкен жиын болатынын жеткізген. 

Міне, сол жиын отырысына (Мемлекетаралық су шаруашылығын үйлестіру комиссиясының 86-отырысы) Қазақстан, Қырғызстан, Тәжікстан, Түркіменстан және Өзбекстан қатысып, нәтижесінде биылғы суару маусымында Өзбекстан Қазақстанға «Достық» каналы арқылы 922 миллион текше метр су жіберетін болып келіскен.

Онда қатысушылар бұдан бөлек, жыл басынан бері еліміз төрағалық ететін Халықаралық Аралды құтқару қоры аясындағы жұмысты жеке талқылауға мүмкіндік алды. Сондай-ақ «Орталық Азия елдері арасында су-энергетикалық ынтымақтастық тетігін құру туралы» келісім жобасы әзірленіп жатқаны белгілі болды.

Бұл ретте Түркістан облысының Шардара су қоймасына 4,8 млрд текше метр су жиналғанын айта кеткен жөн. Ал Қазақстанның оңтүстігіндегі егіс алқаптарын суару үшін су алынатын Тоқтоғұл (Қырғызстан) су қоймасына 8 млрд текше метр су жиналды.

Сондай-ақ отырыста осы жылдың 30 қыркүйегіне дейін Нарын-Сырдария су қоймалары каскады жұмысының болжамды кестесі бекітілді.

«Қазір біздің басты міндетіміз - тасқын суын жинау. Біз оны Каспий, Балқаш, Қамыс-Самар көлдеріне, Ұлытау облысынан Қызылорда облысының көлдеріне және т.б. бағыттаймыз, бірақ сонымен қатар оңтүстік өңірлерді де сумен қамтамасыз ету маңызды. Бұл мәселеде су дипломатиясы өте маңызды», - деді Су ресурстары және ирригация министрі Нұржан Нұржігітов.

Сапарғали Қанат