«Отбасы банк» Өзбекстан мен Малайзия нарықтарына шықпақ

Қазақстанның тұрғын үй нарығындағы басты қаржы институты «Отбасы банк» өзінің даму тарихындағы ең ауқымды өзгерістер кезеңіне аяқ басты. Банк жақын арада өзінің имиджі мен қызмет көрсету географиясын түбегейлі өзгертіп, «арнайы өнімдер кредиторына» айналуды жоспарлап отыр. Бұл стратегиялық қадамдар туралы Bloomberg агенттігі «Бәйтерек» холдингі басқарма төрағасының орынбасары Тимур Оңжановтың мәлімдемесіне сілтеме жасап хабарлады.

Жаңа стратегия аясында банк бұрынғы үйреншікті ипотекалық бағыттан бөлек, қаржы нарығындағы жаңа тауашаларды иеленбек. Атап айтқанда, банк портфелінде исламдық қаржыландыру тетіктері мен лизингтік бағдарламалар пайда болады. Бұл қадамдар банктің тек ішкі нарықта емес, сонымен қатар Өзбекстан, Малайзия және Таяу Шығыс елдерінің нарықтарында бәсекеге қабілетті болуына жол ашады. Сонымен қатар, «Бәйтерек» холдингінің басшылығы банктің тұрғын үй бөлімшесінің акцияларын ашық нарыққа шығарып, IPO өткізу мүмкіндігін де қарастыруда.

Тимур Оңжановтың түсіндіруінше, бұл өзгерістер «Бәйтерек» холдингін кешенді трансформациялау жоспарының бір бөлігі. Ендігі кезекте мемлекеттік оператор тек субсидиялар мен қаржы құралдарын таратумен шектелмей, жобаларды терең талдауға, қаржылық аудит пен мәмілелерді құрылымдауға тікелей қатысатын болады.

 «Барлық процесс, яғни жобаны іздеуден бастап оны қаржыландыруға дейінгі барлық кезең холдинг ішінде жүзеге асырылады», - деп атап өтті ол.

Банктің мұндай батыл қадамдарға баруына оның тұрақты қаржылық көрсеткіштері негіз болып отыр. Соңғы мәліметтер бойынша, 2025 жылдың желтоқсан айында Қазақстанның банк секторындағы депозиттер көлемі 2,1 трлн теңгеге артқан. Бұл ретте «Отбасы банк» ірі қаржы институттары арасында салымдардың өсу қарқыны бойынша үздік нәтиже көрсетті. Банктегі жеке тұлғалардың депозиттері бір айдың ішінде 12%-ға өсіп, абсолюттік мән бойынша елдегі үздік үштіктің қатарынан көрінді. Бұл көрсеткіш халықтың банкке деген сенімінің жоғары екенін және жаңа халықаралық жобаларды бастауға қажетті капиталдың жеткіліктілігін айғақтайды.