Өскеменнің экс-әкімі Жақсылық Омар 6 жылға сотталды

Өскемен қаласының бұрынғы әкімі Жақсылық Омарға сот үкімі шығып, ол 6 жылға бас бостандығынан айырылды.

Сот шешіміне сәйкес, экс-шенеуінік жазасын орташа қауіпсіздік мекемесінде өтейді. Прокурор да 6 жыл бас бостандығынан айыру жазасын сұраған, ал қорғау тарапы бас бостандығынан айырмайтын жаза тағайындауды өтінген.

Сот Жақсылық Омарды алаяқтық және пара алу баптары бойынша кінәлі деп таныды. Іс оның Өскемен әкімі және Шығыс Қазақстан облысы әкімінің бірінші орынбасары болған кезеңіне қатысты.

Тергеу нұсқасы бойынша, эпизодтардың бірінде ол шамамен 13 млн теңге тұратын 2021 жылғы Toyota Camry автокөлігін материалдық көмек ретінде рәсімдетіп алған. Кейін көлік үшінші тұлғаға рәсімделіп, жаңа көлікке айырбасталған.

Екінші эпизод бойынша, Омар әкімдік қызметкерінен 20 млн теңге талап еткен. Қызметкер бұл туралы ҰҚК-ге хабарлаған, кейін барлық әрекеттер арнайы қызметтің бақылауымен жүргізілген. Соның нәтижесінде делдал арқылы 6 млн теңге беріліп, ұсталған кезде 5,6 млн теңге тәркіленген.

Іс сотта жеделдетілген тәртіппен қаралған.