Өскемен гарнизонындағы маңызды жиын: Әскери прокурорлар әлімжеттікке қарсы іс-қимыл шараларын таныстырды

Шығыс Қазақстан облысында Ұлттық ұланның 5518 әскери бөлімінде «Сарбазға прокурорлық кеңес» атты ауқымды республикалық акция өтті. «Заң мен тәртіп» қағидасын негізге алған шара әскери қызметтің ашықтығы мен қауіпсіздігін нығайтуды көздейді.

Іс-шараның шымылдығы «Ашық есік» күнімен ашылды. Шараға әскери прокуратура өкілдері, ардагерлер және қала колледждерінің студенттері қатысты. Қонақтар назарына жедел мақсаттағы жауынгерлік топтың кәсіби іс-қимылдары ұсынылып, заманауи қару-жарақ пен әскери техниканың мүмкіндіктері таныстырылды.

Жиынның ресми бөлімінде Өскемен гарнизонының әскери прокуроры, әділет полковнигі Есжан Сыбанбаев сарбаздармен тікелей диалог орнатты. Прокурор әскери ортадағы тәртіптің маңыздылығын баса айтып, әлімжеттік пен кез келген заңсыз әрекеттердің алдын алу бойынша қатаң ескертулер жасады.

Прокуратура ардагерлері Виктор Подрезов пен Ғазиз Найзабаев өз кезегінде жауынгерлерге қызметтік тәжірибелерінен сыр шертіп, әскери борышты абыроймен өтеудің тұлғалық маңызына тоқталды.

Мерекелік шара барысында Отан қорғаушылар күніне орай, қызметінде мінсіз тәртіп көрсеткен бірқатар сарбаздар мен офицерлер арнайы марапаттарға ие болды. «Шығыс» өңірлік қолбасшылығының қолбасшысы, генерал-майор Арман Жұмағалиев мұндай кездесулердің жеке құрамның рухын көтерудегі және құқықтық сауаттылығын арттырудағы рөлі зор екенін атап өтті.