$ 509.63 € 592.34 ₽ 6.54

Өскемен әуежайының басшылығы бес жыл бойы қаржы жымқырып келген

Абдрахманов Мағжан
16 шілде 2025, 10:16
Өскемен әуежайының басшылығы бес жыл бойы қаржы жымқырып келген Сурет авторы: sozmedia.kz

Қаржылық мониторинг агенттігі Өскемен әуежайының бұрынғы басшылығына қатысты қылмыстық істі тергеп-тексеру жұмыстарын аяқтады. Ведомствоның мәліметінше, күдіктілер қамауда отыр.

Оларға қызметтік өкілеттігін теріс пайдалану, аса ірі көлемде сеніп тапсырылған мүлікті иемдену және ақшаны заңдастыру баптары бойынша айып тағылған.

"Бес жыл бойы акционерлік қоғамның бұрынғы президенті мен өзге де лауазымды тұлғалары жүйелі түрде қаржыны жымқырған. Олар жалақыны негізсіз арттырып, жалған сыйақылар тағайындаған, сонымен қатар жалған келісімшарттар жасасқан. Қаражат әуежай кассасы арқылы қолма-қол ақшаға айналдырылып отырған", – делінген агенттік хабарламасында.

Тергеу барысында күдіктілер кәсіпорынның көліктерін өздеріне аффилиирленген тұлғаларға төмен бағамен сатып жібергені де анықталған.

"Бұған қоса, әуежайға тиесілі коммерциялық нысандарды нарықтан төмен бағамен және жалға алынған аумақты азайтып көрсету арқылы жеңілдікпен жалға берген. Мемлекетке келтірілген жалпы залал 157 млн теңге болды", – деді агенттік.

Күдіктілердің төрт пәтері, бір жер телімі мен екі автокөлігі тәркіленді. Аталған мүліктің жалпы құны – 126 млн теңге.

#Өскемен әуежайы #Қаржы жымқыру

Соңғы жаңалықтар