Оралдағы газ бекеттерінде ұзын-сонар кезек түзілді

Бірнеше күннен бері Оралдағы газ бекеттерінде кезек пайда болды. Бұл туралы Мой Город хабарлады.

"Осы жағдай әрдайым қайталанады: кейбір бекетте газ жоқ, сондықтан бүкіл қала болып қалған газ құю станцияларында кезекке тұруға мәжбүрміз", – дейді оралдық жүргізушілер.

Ал БҚО энергетика басқармасы сұйытылған газдың тапшылығы жоқ, тек әлеуметтік арзан газға шектеулер бар деп мәлімдеді.

"Мұндай жағдай әр тоқсанның соңында байқалады, әлеуметтік газ кейбір бекеттерде таусылып қалады, біз бұл мәселені энергетика министрлігі арқылы шешеміз. Бірақ 1 қазаннан бастап біз толығымен "Жайықмұнайдың" Рожков кен орнындағы газға көшетін боламыз. Өткен жылдың соңында ол жерде газ өңдеу зауыты ашылды, бұл зауыт өңірдің сұйытылған автогазға деген қажеттілігін толық қамтамасыз етеді", - деді БҚО энергетика және ТКШ басқармасының басшысы Мирас Мұлқай.

Оның айтуынша, ай сайын өңірге шамамен 4000 тонна газ қажет. Сұйытылған газдың арзан болғаны автокөлік жүргізушілері арасында сұраныстың артуына, ал ол кезектердің пайда болуына әкеледі.