Оралда өзенде шомылып жүрген 12 жасар бала қаза тапты

Оралда 12 жасар баланы саяжай суаратын сорғы тартып кетіп мерт қылды. Бұл туралы Мой Город басылымы хабарлады.

Қайғылы оқиға 4 шілдеде Дерқұл ауылында болған. 12 жасар Аман Сейфолла немере ағасымен Дерқұл өзеніне шомылуға барған. Марқұмның анасы Мирамгүл Есетова баласын жібергісі келмегенін айтады. Бірақ кіші балаларымен алданып жүргенде, балалар кетіп қалған.

"Жағаға жақын жерде бақша суаратын сорғы жұмыс істеп тұрды. Мен оның кімдікі екенін білмеймін, саяжай иелерінікі шығар. Аманның сол аяғын сорғы жамбасына дейін сорып алған. Сорғы сүзгісіз жұмыс істеген, оны ешкім қадағаламаған. Жай ғана қосып, кетіп қалған. Куәгерлер ұлымды аман алып қала алмады. Оның үстіне жұрт өз күштерімен оны судан шығара алмаған. Ер адамдар оның басын судың үстінде ұстап тұрған, бірақ тым кеш болды. Содан құтқарушылар келіп, құбырды кесіп, Аманды құбырмен бірге судан алып шықты. Жедел жәрдем оны аман алып қалуға тырысты, бірақ одан еш нәтиже шықпады. Балам көп су жұтып қойған, аузынан көбік шығып, аяғы көгеріп кетті", – деп есіне алады әйел.

Мирамгүл болған жайды жиенінен білген. Әйел сол жерге жүгіріп барғанымен, оны суға жақындатпай қойған. Ал адамдар баланың денесін шығарып алмақ болған. Осылайша әйел жағада бір сағатқа жуық тұрды. Баланы судан алып шыққанымен, анасын жанына жақындатпаған. Бала әлдеқашан қайтыс болып кеткен еді. 

"Бұл сорғы ештеңемен қоршалмаған және жағаға жақын орнатылған. Менің баламның орнында кез келген адам болуы мүмкін еді. Қазір бәрі менің балам кінәлі дейді. Мұндай қайғы ешкімнің басына түскенін қаламаймын. Кінәлілерді тауып, жазалауды талап етемін, ал мұндай қайғылы оқиғалар қайталанбауын қалаймын", – дейді Мирамгүл Есетова.

Әйел полицияға арыз жазбақ ниетте.

Ал БҚО Төтенше жағдайлар департаменті бала суға түсуге тыйым салынған жерде шомылған дейді. Ведомство баланың саяжайларды суаратын сорғы орнатылған пантонның үстінен секіргенін айтады.