OpenAI мектеп оқушыларына арналған арнайы нұсқасын ұсынды: ЖИ енді үй тапсырмасын орындап бермейді

Танымал OpenAI компаниясы 13 пен 17 жас аралығындағы мектеп оқушыларына арналған ChatGPT чат-ботының арнайы нұсқасын іске қосатынын мәлімдеді. Жаңа жоба цифрлық дәуірде өсіп келе жатқан жас буынға жасанды интеллектіні қауіпсіз әрі тиімді пайдалануға бағытталған.

Әзірлеушілердің айтуынша, бұл нұсқада балалардың психикасына кері әсер етуі мүмкін тақырыптарға, атап айтқанда суицид, өзіне зиян келтіру, сондай-ақ романтикалық немесе сексуалды суреттеулерге қатаң шектеулер қойылған. Бұдан бөлек, жүйе тамақтану бұзылыстары сияқты сезімтал мәселелерде ақпаратты шектеп беріп, қажет жағдайда оффлайн режимінде мамандардың көмегіне жүгінуді ұсынады.

Басты жаңалықтардың бірі - жасанды интеллект енді мектеп оқушыларының оқу тапсырмаларын дайын күйінде орындап бермейді. Жүйе оқушыға бірден дайын жауапты ұсынбай, оны өз бетінше ойлануға және шешім табуға бағыттайтын тәлімгер ретінде жұмыс істейді.

Сонымен қатар ата-аналарға арналған арнайы бақылау функциялары қарастырылған. Егер ата-ана баласының аккаунтына қосылса, олар чат-ботты пайдалануға "тыныш сағаттар" белгілеп, қауіпсіздікке қатысты ескертулерді алып отыра алады.

Пайдаланушылардың жасын анықтау үшін OpenAI арнайы алгоритмдерді қолданады. Сұрақтардың сипаты мен жүйеге қойылған талаптарға қарай технология қолданушының 18 жасқа толған-толмағанын анықтап, оны автоматты түрде жасөспірімдерге арналған режимге ауыстырады.

Жаңа бастама жастар арасында жасанды интеллектіні жауапкершілікпен пайдалану мәдениетін қалыптастыруға арналған маңызды қадам болып отыр.