«Оның жалғыз жетістігі – Марко ван Бастенмен бірге ойнағаны»: Ермұхамед Мәулен ван ’т Шкип туралы

Қазақстан ұлттық құрамасының жаңа бас бапкері Джон ван ’т Шкиптің тағайындалуы футбол ортасында түрлі пікір туғызды. Қазақстан футбол федерациясы нидерландтық маманды қиын жағдайда жұмыс істей алатын, халықаралық тәжірибесі мол бапкер ретінде таныстырды. Алайда футбол функционері Ермұхамед Мәулен бұл таңдауға әлдеқайда сын көзбен қарайды.

Qrnews Ермұхамед Мәуленмен ван ’т Шкиптің «Аякс», Грекия мен Армениядағы жұмысы, Қазақстан құрамасының қазіргі жағдайы және Ұлттар лигасындағы міндеті туралы сөйлесті.

– ҚФФ ван ’т Шкипті «қиын жағдайда жұмыс істей алатын маман» деп таңдағанын айтты. Оның карьерасында мұны дәлелдейтін кезеңдер бар ма?

– Қиын жағдайдағы, дағдарысқа ұшыраған жерлерде жұмыс істеген. Тағы сондай жерге келіп отыр. Біз де қиын жағдайда тұрған құрама ретінде шақырып отырмыз ғой бұл маманды. Ештеңе көмектеспей жатыр. Бапкер ауыстырды – болмады. Әли Әлиевті қойды, мысалы. ҚПЛ-де ешқандай жетістікке жетпеген маман болса да. Талғат Байсуфинов келіп, кішкене жақсарып қалып еді. Ол да кетті.

– Ван ’т Шкиптің пайдасына жиі айтылатын аргументтің бірі – «Аяксты» соңғы орыннан бесінші орынға көтеруі. Мұны маңызды жетістік деуге бола ма?

– Чемпион болса, мақұл ғой. «Аякс» соңғы 30 жыл бойы Голландияда үздік үштікке кіріп келген команда. Чемпиондар лигасын ұтқан команда. Бірнеше жыл бұрын «Реал Мадридті» жеңіп, Чемпиондар лигасының жартылай финалында ойнады. Бесінші орын ауыз толтырып айтуға болатын нәтиже емес.

– Грекиядағы жалпы статистикасы жаман емес: 26 матчта 11 жеңіс, 9 тең ойын, 6 жеңіліс. Бірақ команда әлем чемпионатына өте алмады. Бұл кезеңді табысты деп бағалайсыз ба?

– Әлбетте, табысты емес. Грекияда оны қарғайды. Грекия әлем чемпионаттары мен Еуропа чемпионаттарында ойнап жүрген команда ғой. Ван ’т Шкип келгенде әлем чемпионатына өте алмай қалды. Грекия футбол федерациясы оны енді шақырмайды. Нашар нәтиже болды.

– Оның Қазақстанға дейінгі соңғы жұмысы – Армения құрамасы. Төрт матчта бірде-бір жеңіс жоқ. Бұл Қазақстандағы перспективасына алаңдауға негіз бере ме?

– Әрине, береді. Сұмдық нәрсе ғой. Армениямен төрт ойында ештеңеге жетпеген. Арменияның менталитетін түсінбеген адам Қазақстанның менталитетін қай жақтан түсінсін? Оған Кюрасао, Кабо-Верде, Суринам деген елдерді баптау керек. Қазақстан да ол үшін қате таңдау деп ойлаймын. Көрейік, уақыт көрсетеді. Бірақ алаңдауға үлкен негіз бар.

– ҚФФ жаңа бапкердің алдына Ұлттар лигасында жоғары нәтиже көрсету міндетін қойды. Ван ’т Шкип үшін қандай нәтиже табыс болып саналады?

– Тек бірінші орын. Біз бұған дейін осы Ұлттар лигасын жеңдік, құрама басында Магомед Адиев болды. Словакияны екі рет ұттық. Беларусьті қарсылас көрмей екі рет ұттық. Тек Әзербайжаннан жеңілдік. Ал қазір Словакиямен ойнасақ, оны жеңе алмаймыз. Фарер аралдарымен тең ойнағанымызға разы боламыз. Ван ’т Шкип Қазақстан құрамасының Словакияны жеңетініне сенім беретін бапкер емес. Wikipedia-ны ашып, бұл бапкердің қандай жетістікке жеткенін қарап көріңізші. Оның жалғыз жетістігі – Марко ван Бастенмен бірге ойнағаны.

– Сонда оның жұмысын бағалаудың басты өлшемі не болады?

– Еңбек мұғалімі ауырып, сабаққа келмей қалып, соның орнына дене шынықтыру мұғалімі сабақ беруге келгендей жағдай. Уақытша бапкер. Ұлттар лигасын жеңу керек, болмаса кетеді. Тек бірінші орын керек. Екінші, үшінші орын алса да, кетеді. Тағы жаңа бапкер іздейтін боламыз. Менің болжамым осы.

Қазақстан Ұлттар лигасының C дивизионында Словакия, Фарер аралдары және Молдовамен бір топта ойнайды. ҚФФ-ның ресми мақсаты – топты бірінші орынмен аяқтап, B дивизионына қайта көтерілу.

Ван ’т Шкип ресми түрде тағайындалмай тұрып-ақ Қазақстан Премьер-лигасының матчтарына барып, құрамаға үміткер футболшыларды бақылауды бастады. Оған бейімделуге көп уақыт жоқ: Қазақстан 26 қыркүйекте Фарер аралдарына қарсы Ұлттар лигасындағы алғашқы кездесуін өткізеді.

Алты матчтан кейін ҚФФ нәтижені саралап, нидерландтық маманмен әрі қарай жұмыс істеу мәселесін шешпек. Ермұхамед Мәуленнің болжамы бойынша, бұл шешімнің өлшемі қарапайым: бірінші орын немесе тағы да жаңа бапкер іздеу.