Оңтүстік Корея Қазақстаннан мұнай сатып алатын болды

Бұл туралы елдің өнеркәсіп министрі Ким Чжон Кван KBS телеарнасына берген сұхбатында мәлімдеді.

«Айтарлықтай прогреске қол жеткіздік, сондықтан келесі аптаның басында нақты көлемдер мен егжей-тегжейлі мәліметтерді жариялай аламыз», - деді министр.

Оңтүстік Корея энергия ресурстарының импортына толықтай дерлік тәуелді, соның ішінде мұнайдың шамамен 70%-ы Таяу Шығыстан келеді. Ормуз бұғазы арқылы тасымалдың қиындауы елді өте осал жағдайға қалдырды.

Оңтүстік Корея тәулігіне шамамен 2,5 миллион баррель мұнай тұтынады. Жағдайды қиындатып отырған тағы бір мәселе - бұғаз арқылы тек мұнай ғана емес, жартылай өткізгіштер өндірісіне өте қажет гелий де тасымалданады. Нафта тапшылығынан полиэтилен, медициналық ерітінділер, қаптамалар мен шприцтер шығаруда қиындықтар туындады. Наурыз айының соңында ұлттық валюта - вона - соңғы 17 жылдағы ең төменгі деңгейге түсіп, бір доллар үшін 1530 вонадан асып кетті.

Бұған дейін Президент әкімшілігінің басшысы Кан Хун Сик пен министр Ким шикі мұнай мен нафта жеткізу туралы келісу үшін Қазақстанға арнайы келген болатын. Оңтүстік Корея делегациясы энергия импортын әртараптандыру мақсатында Оман мен Сауд Арабиясында да болды.

Екі ел арасындағы ауқымды жеткізілім тәжірибесі бар: 2023 жылы Ресейге қарсы санкциялар енгізілгеннен кейін Оңтүстік Корея нарығына шамамен 34,5 миллион баррель қазақстандық мұнай түскен. Кореяның ұлттық мұнай корпорациясы қазақстандық нарықта бірнеше жылдан бері жұмыс істеп келеді және «Ада», «Арыстан» және «Құлжан» атты үш кен орнына иелік етеді.

«Қазақстан өте алыс болып көрінуі мүмкін, бірақ іс жүзінде жеткізу уақыты АҚШ-тан келетін уақытпен бірдей — шамамен 50–60 күнді құрайды», — деп атап өтті министр Ким. Ол Қазақстанға сапардың негізгі мақсаты жеткізілімді ұзақ мерзімді әртараптандыру екенін айтты.

Сонымен қатар Жапония да Ормуз бұғазындағы блокадаға байланысты қазақстандық мұнайға көшу ниетін білдірді. Осылайша, Қазақстан бүкіл Азия-Тынық мұхиты аймағы үшін негізгі баламалы энергия жеткізушілердің біріне айналуда.