Оңтүстік Корея дәрігерлері қазақстандықтарды қалай қашықтан емдемек?

Қазақстанның медицина саласында үлкен серпіліс орын алды. Енді Маңғыстау облысының тұрғындары елден шықпай-ақ, Оңтүстік Кореяның ең үздік профессорлары мен білікті дәрігерлерінен тікелей онлайн-консультация алу мүмкіндігіне ие болды. Бұл туралы аймақтағы «Лада» басылымы Маңғыстау облыстық көпбейінді ауруханасының директоры Берік Қауновтың мәлімдемесіне сілтеме жасап хабарлады.

Оңтүстік Кореяның Квандон Католик университеті жанындағы «Қасиетті Мария» халықаралық медициналық орталығының делегациясы Маңғыстау өңіріне арнайы сапармен келді. Сапар аясында облыстық денсаулық сақтау басқармасы мен корейлік клиника арасында маңызды ынтымақтастық меморандумына қол қойылды.

Жаңа жобаның басты ерекшелігі:

 Күрделі диагнозы бар қазақстандық науқастар корей мамандарынан жедел түрде екінші медициналық қорытындыны (second opinion) қашықтан ала алады.

 Науқастарға қымбат тұратын шетелдік клиникаларға барып, жол мен қонақүйге шығындалудың қажеті болмайды.

 Ақтау қаласының ең ірі ауруханаларын аралаған корейлік делегация жергілікті дәрігерлермен тәжірибе алмасып, отандық мамандардың біліктілігін арттыруға уағдаласты.

Қазақстан тек сырттан кеңес алып қана қоймай, өзі де шетелдіктерді емдейтін орталыққа айналуда. University Medical Center (UMC) клиникаларында екі мыңнан астам шетелдік азамат емделіп шыққан. Олардың басым бөлігі Қырғызстан, Тәжікстан және Ресейден келсе, арасында Түркия, АҚШ, Германия, Ұлыбритания және Аустралия азаматтары да бар.

ҚР Денсаулық сақтау министрлігінің мәліметінше, шетелдік туристер Қазақстанда мынадай күрделі қызметтерді таңдайды:

Жүрекке жасалатын оталар, онкологиялық ауруларды емдеу, буындарды протездеу, жоғары технологиялық хирургиялық араласулар және сапалы стоматологиялық көмек. Ведомство өкілдері Қазақстанның шетелдік емделушілерді ең алдымен медициналық қызметтердің жоғары сапасымен және бағаның қолжетімділігімен баурап отырғанын атап өтті.