Onay қала ма, әлде Avtobys па? Әкімдіктің ресми жауабы

Алматы қаласының әкімдігі жолаушыларға қолайлы жағдай жасау мақсатында қоғамдық көлікте екі бірдей электронды төлем жүйесін енгізу туралы шешім қабылдады.

Қалалық Мобильділік басқармасының мәліметінше, мегаполис бағдарларында бұрыннан келе жатқан Onay жүйесімен бірге жаңа Avtobys цифрлық жүйесі қатар қызмет көрсететін болады. Ведомство қолданыстағы операторды ауыстыру мәселесі қарастырылып жатпағанын ресми түрде мәлімдеді.

Екі жүйенің де бірдей қолданылуы жолаушыларға төлем жасаудың қосымша тәсілдерін таңдауға мүмкіндік береді.

Avtobys жүйесі алдымен жекелеген бағдарларда, содан кейін қаланың бүкіл қоғамдық көлік желісінде іске қосылады. Қазіргі уақытта автобустарды екінші оператордың жабдықтарымен жарақтандыру жұмыстары басталып кетті.  
Айта кетейік, жаңа жүйенің енгізілуіне байланысты Автобус тасымалдаушылары қауымдастығы Бәсекелестікті қорғау және дамыту агенттігіне шағым түсірген болатын. Алайда басқарма бұл қадамды нарықты монополиялау емес, сервисті жақсарту деп түсіндіреді.

 «Жолаушылардың ыңғайлылығын арттыру үшін отандық операторлардың ұсыныстары қаралды. Нәтижесінде Алматыда төлемнің әртүрлі тәсілдерін ұсынатын екінші оператор - Avtobys жүйесін енгізу туралы шешім қабылданды», - делінген хабарламада.

Сонымен қатар Avtobys операторы қала бойынша стандартты көлік карталарын сататын жеке нүктелер желісін құруды бастады.