Олжас Сүлейменов Нобель сыйлығына ұсынылды

Қазақстанның көрнекті ақыны, жазушысы, қоғам қайраткері Олжас Сүлейменов Нобельдің бейбітшілік сыйлығына ресми түрде ұсынылды. Бұл туралы «Байтақ» жасылдар партиясының баспасөз қызметі хабарлады.

Партия мәліметінше, шешім Алматыда өткен партия филиалының V конференциясында қабылданған. Партия төрағасы Азаматхан Әміртаев Сүлейменовтің кандидатурасын Нобель сыйлығына ресми түрде ұсынғанын жариялады.

Партия бұл бастаманы «Қазақстан ғана емес, бүкіл әлем үшін еңбегін аямай қызмет еткен тұлғаны жоғары деңгейде мойындау» деп бағалап отыр.

Сүлейменовтің тарихи рөлі, әсіресе «Невада–Семей» антиядролық қозғалысының негізін қалаушы ретіндегі еңбегі шешуші фактор болған. Оның бастамасы мен азаматтық белсенділігінің арқасында Семей ядролық сынақ полигоны жабылды. Сондай-ақ ол әлемнің бірнеше елінде, оның ішінде АҚШ-тың Невада штатында, тағы төрт ірі ядролық полигонның жабылуына ықпал еткен.

Әміртаевтың айтуынша, Сүлейменов «қазақ халқының рухани тірегі ғана емес, әлемге бейбітшіліктің үнін жеткізген бірегей тұлға». Сондықтан оны Нобель сыйлығына ұсыну – тарихи әділеттілік.

Партия өкілдері бұл бастама Қазақстанның халықаралық беделін арттырып, елдің бейбітсүйгіш саясатын жаңа деңгейге көтереді деп сенеді.

Олжас Сүлейменов – Қазақстанның халық жазушысы, Социалистік Еңбек Ері, Абай атындағы мемлекеттік сыйлықтың лауреаты, «Невада–Семей» қозғалысының негізін қалаушы, көптеген поэзиялық еңбектің және «Аз и Я» сияқты әйгілі ғылыми-зерттеу еңбектердің авторы.