"Олимпиакос" ойыншысы "Қайратты" ұту үшін не істеу керек екенін айтты

«Олимпиакос» клубының аргентиналық жартылай қорғаушысы Сантьяго Эссе Чемпиондар лигасының жалпы кезеңіндегі «Қайратқа» қарсы алдағы ойынға қатысты пікір білдірді.

«Ең алдымен, бұл – кезекті бір матч екенін түсінуіміз қажет. Біз жеңіске жете аламыз және оған лайықпыз. Жеңіс үшін алаңға шығамыз. Тек өз жұмысымызды орындау керек», – деді Эссе.

Ол ауа райының әсерін болжай алмайтынын айтты, бірақ екі команда да бірдей жағдайға тап болатынын атап өтті.

«Ертеңгі ойынға ауа райы қалай әсер ететінін білмеймін. Бірақ біз тең жағдайда ойнаймыз. Жақсы командалық жұмыс көрсетіп, жаттықтырушылардың тапсырмаларын орындауға тырысамыз. Сонда ғана жеңіске жетеміз», – деді футболшы.

«Қайрат» пен «Олимпиакос» арасындағы матч 9 желтоқсан, сейсенбі күні өтеді. Ойын Қазақстан уақытымен 20:30-да басталады. Қолайсыз ауа райынан қауіп болмас үшін матчты Астанада өткізу туралы шешім қабылданған.

Бес турдан кейін «Олимпиакос» екі ұпаймен 33-орында тұр. «Қайрат» бір ұпаймен 35-орында келеді.