Олимпиадада Шайдоров қатысатын гала-көрсетілімдерді қайдан және қашан көруге болады?

Қазақстандық мәнерлеп сырғанаушы, Миландағы Олимпиада ойындарының алтын жүлдегері Михаил Шайдоров Италия айдынында өтетін салтанатты гала-концертке қатысады. Бұл туралы Олимпиаданың ресми сайты хабарлады.

Гала-концерт 21 ақпан күні жергілікті уақытпен сағат 20:00-де басталады. 2,5 сағатқа созылатын айтулы шоуға мәнерлеп сырғанаудың барлық бағыттары бойынша жеңімпаздар мен жүлдегерлер, сондай-ақ командалық жарыстың үздік спортшылары қатысады.

Михаил Шайдоров көрермен назарына өзінің ерекше дайындаған «Кунг-фу Панда» мультфильмі желісіндегі көрсетілімдік нөмірін ұсынады. Спортшы бұл кейіпкердің өзі үшін маңызы зор екенін атап өтті.

«Мен „Кунг-фу Панданы“ орындауды жоспарлап отырмын. Бұл менің осы Олимпиада ойындарындағы басты мақсаттарымның бірі болатын. Өйткені бұл - менің ең сүйікті кейіпкерім. Панда бір жағынан айдаһар жауынгері секілді өте мықты болса, екінші жағынан — өте ебедейсіз, күлкілі әрі тамақ жегенді жақсы көреді. Осы басты қасиеттер біздің бойымыздан да табылатын сияқты», - деді Михаил Шайдоров Qazsport телеарнасына берген сұхбатында.

Миландағы мұз айдынында Михаилмен бірге әлемдік деңгейдегі жұлдыздар: Илья Малинин (АҚШ), Юма Кагияма (Япония), Адам Сяо Хим Фа (Франция), Мэдисон Чок пен Эван Бейтс (АҚШ) және басқа да танымал фигуристер өз өнерлерін көрсетеді. Әйелдер арасындағы жекелей сырғанаудан кімдердің қатысатыны әлі нақтыланбады.
Қазақстандық жанкүйерлер гала-концерттің тікелей трансляциясын 21 ақпан күні сағат 23:55-те «Jibek Joly» телеарнасынан тамашалай алады.

Еске сала кетейік, 14 ақпанда 21 жастағы Михаил Шайдоров еркін бағдарламада 198,64 балл жинап (жалпы есепте 291,58 балл), мәнерлеп сырғанаудан Қазақстан тарихындағы тұңғыш Олимпиада чемпионы атанды.