Олимпиада чемпионы Михаил Шайдоровқа неге жалақы төленбей жатыр: Спорт шенеуніктері жауап берді

Мәнерлеп сырғанаудан Олимпиада чемпионы Михаил Шайдоров Олимпиададағы жеңісінен кейін өзіне жалақы төленбей жатқанын және ақпан айынан бастап дәрігерсіз қалғанын мәлімдеді. Бұл жөнінде спортшы YouTube-тегі Тимур Балымбетовтің подкастында айтты.

«Менің жалақымды жария ету құрметсіздік болды. Осылайша менің, отбасымның, әкемнің еңбегін құнсыздандырғысы келгендей көрінді. Жағымсыз пікір білдіргенім үшін мені, шамасы, осылай жазалағысы келді. Олимпиададағы жеңістен бері жалақы алмадым. Келесі маусымға дайындалуым керек, бірақ қалай дайындалатынымды түсінбеймін. Ал 1 ақпаннан бастап дәрігерімді алып тастады. Мен үшін бұл таңқаларлық жағдай», – деді Михаил Шайдоров.

ҚР Туризм және спорт министрлігінің Спортты дамыту дирекциясы спортшының бұл мәлімдемесіне қатысты бірден ресми түсініктеме берді. Ведомствоның ақпаратынша, қаңтар және ақпан айларының жалақысы бұрынғы келісім бойынша толық төленген, ал наурыздан бастап жаңа олимпиадалық циклге байланысты қаржыландыру шарттары жақсартылған жаңа еңбек шарты дайындалуда. Қазіргі уақытта құжаттың заңдық детальдары мен тиімділік индикаторлары келісіліп жатқандықтан қол қою процесі созылған, бірақ шарт жасалғаннан кейін төлемдер бірден қайта басталады.

Сондай-ақ дирекция мемлекет тарапынан Михаил Шайдоровтың Миландағы Олимпиада ойындарындағы тарихи жеңісі үшін барлық міндеттемелердің толық орындалып жатқанын алға тартты. Алтын медаль үшін спортшыға 250 мың доллар көлемінде ақшалай төлем, Алматы қаласынан үш бөлмелі пәтер және өмірлік ай сайынғы мемлекеттік төлемақы қарастырылған.

Еске сала кетейік, Михаил Шайдоров қысқы Олимпиада ойындарында екі бағдарламаның қорытындысы бойынша 291,58 ұпай жинап, алтын медаль жеңіп алған болатын. Ақпан айының соңында Спорт министрлігі Шайдоровтың жылдық жалақысы 33,9 миллион теңгені, ал оның дайындығына жұмсалған жалпы шығын 263,4 миллион теңгені құрағаны туралы есеп жариялаған еді.