Олигополия иелігіндегі 800 мың гектар жер мемлекетке қайтарылды

Алатау бөктерінде, Каспий теңізі жағалауында және «Бурабай» ұлттық паркі аумағында орналасқан, жалпы көлемі 800 мың гектар жер мемлекет меншігіне қайтарылды. Бұл туралы Қазақстан Республикасының Бас прокуроры Берік Асылов мәлімдеді.

Бас прокурордың айтуынша, қайтарылған жерлердің қатарында ауыл шаруашылығы алқаптары мен қоғамдық жайылымдар бар. Аталған аумақтар бұрын олигополиялық құрылымдардың иелігінде болып, жылдар бойы мақсатты түрде пайдаланылмаған.

Берік Асыловтың мәліметінше, бірқатар өңірде жайылым тапшылығы мәселесі іс жүзінде шешілген. Прокуратура органдары жайылымдарға қолжетімділікті қамтамасыз етіп, оларды ауылдық жерлердің барлық тұрғыны пайдалануына мүмкіндік берген.

Сонымен қатар жер қатынастарына қатысты даулы мәселелер де бар. 2025 жылғы қыркүйекте Ақмола облысында жер ресурстары жөніндегі департамент соңғы 20 жылда Бурабай және Светлый елді мекендерінде жасалған жер мәмілелерін жарамсыз деп тануды талап еткені белгілі болды. Бұл жағдай бірнеше мың тұрғын мен кәсіпкерге қатысты. Тұрғындар жер телімдері заңды түрде рәсімделгенін, оған қомақты қаржы салынғанын айтып, өз құқықтарын сот арқылы қорғауға дайын екенін мәлімдеген. Ал департамент бұл жерлер ұлттық парк аумағында орналасқандықтан, оларды беру заң талаптарын бұзғанын алға тартып отыр.

Бұған қоса, 2025 жылғы қазанда Премьер-министр Олжас Бектенов Алматы қаласының жоғарғы бөлігіндегі Іле Алатауы бөктерінде орналасқан 25 жер телімінің заңдылығына қатысты тексеріс жүргізіліп жатқанын хабарлаған. Бұл аумақтарда бұрын тауларды заңсыз кесу мен жаппай құрылыс фактілері анықталған. Қала құрылысы бақылауы басқармасы мен әділет органдары заңбұзушылықтарға қарсы шаралар қабылдап, айыппұл салу, нұсқама беру және заңсыз нысандарды бұзу жұмыстарын жүргізіп жатыр. Мәліметке сәйкес, 35 істің 20-сы бойынша нысандарды бұзу толық аяқталған.