Ол - нағыз умница»: Беларусь лидері Тоқаевтың қай қасиетіне тәнті болды?

Беларусь Президенті Александр Лукашенко «Ұлы тас» Беларусь-Қытай индустриялық паркіне жаңа басшы тағайындау кезінде Қазақстан Президенті Қасым-Жомарт Тоқаевтың білімін жоғары бағалап, оны өзгелерге мысал етті. Жиын барысында жаңадан тағайындалған басшы Қытайды жақсы білетінін, бірақ тілінің тым күрделілігіне байланысты оны үйрену қиынға түсіп жатқанын айтқан болатын.

Лукашенко қытай тілін меңгеру кез келген адамның қолынан келетінін айтып, бұған бұлжытпас дәлел ретінде Қазақстан Президентінің кәсіби біліктілігі мен бай тәжірибесін алға тартты.

Лукашенко Қасым-Жомарт Тоқаевтың бұрын дипломатиялық салада аудармашы болып қызмет атқарғанын және қытай тілін жетік меңгергенін еске салды. 

«Міне, бізде Қазақстан Президенті - Тоқаев - аудармашы болып жұмыс істеген. Ол қытай тілін керемет біледі. Кәдімгі ақылды адам. Құдай емес қой, бірақ үйренді емес пе!» -  деп атап өтті Беларусь лидері. 

Оның айтуынша, Тоқаев бұл тілді «көктен түскен қабілеттің» арқасында емес, қажырлы еңбек пен тәжірибе арқылы меңгерген.

Сондай-ақ, Александр Лукашенко ҚХР Төрағасы Си Цзиньпинмен болған әңгімесін де тілге тиек етті. Оның айтуынша, Қытай басшысы тіл үйренудегі ең басты қағида - одан қорықпау екенін айтқан. Лукашенконың бұл пікірі Қазақстан Президентінің халықаралық деңгейдегі жоғары зияткерлік беделін тағы бір мәрте айқындап берді.