Оқушылар мен студенттерге жазда табысы жоғары жұмыстардан сақ болу ескертілді

Қазақстан Республикасы Ішкі істер министрлігі жазғы демалыс қарсаңында мектеп оқушылары мен студенттерге әлеуметтік желілердегі күмәнді жұмыс ұсыныстарына қатысты ресми ескерту жасады. Министрлік өкілдері «жоғары табыс» уәделерінің артында ауыр қылмыстық істер тұруы мүмкін екенін алға тартты.

ІІМ Есірткі қылмысына қарсы іс-қимыл комитеті төрағасының орынбасары Қуандық Әлжановтың мәлімдеуінше, интернет кеңістігінде жастарды заңсыз әрекеттерге тарту жағдайлары жиілеген. Әсіресе, жазғы кезеңде есірткі заттарын тарату («закладчик»), жасырын тасымалдау және есірткі жарнамасы бойынша ұсыныстар көбейеді.

Есірткі қылмыстары үшін қылмыстық жауапкершілік 16 жастан басталады. Қылмыстың ауырлығына қарай, ҚР Қылмыстық кодексі бойынша өмір бойына бас бостандығынан айыру жазасы қарастырылған.

Ішкі істер министрлігі жастарды тез табыс табу жолында болашағына қауіп төндірмеуге, ал ата-аналарды балаларының интернеттегі белсенділігі мен жұмыс іздеу барысын қатаң бақылауда ұстауға шақырды. «Күмәнді жұмыс ұсыныстарынан бас тарту — өміріңіз бен бостандығыңызды сақтаудың жалғыз жолы», — деп атап өтті ведомство өкілі.