Маңғыстаудағы оқиғадан соң депутат сарбаздардың қауіпсіздігі үшін жаңа жүйе енгізу ұсынды

«Әділет» партиясы фракциясының мүшесі, Құрылтай депутаты Аббат Өрісбаев Премьер-министр Олжас Бектеновтің атына депутаттық сауал жолдап, әскери және арнайы оқу-жаттығулар кезінде бірыңғай цифрлық қауіпсіздік жүйесін енгізуді ұсынды.

Депутат Каспийде орын алған соңғы оқиғалардан кейін мұндай жиындарда әскери қызметкерлер мен құтқарушылардың өмірі мен қауіпсіздігі басты орында тұруы тиіс екенін атап өтті.

«Ең маңызды мәселе – адамдардың өмірі мен қауіпсіздігі. Әскери қызметкерлер мен құтқарушылардың қауіпсіздігі оқу-жаттығу кезінде сөзсіз басымдық болуы керек. Қандай жағдай болмасын, төтенше оқиға болған алғашқы минуттарда жедел әрекет ету жүйесі жұмыс істеуі тиіс. Оқу-жаттығу жеке құрамның өміріне қауіп төндірмеуі керек», – деді Аббат Өрісбаев.

Депутат сауалында қауіпсіздікті қамтамасыз етуге бағытталған бірқатар нақты шараларды ұсынды:

• Дрондармен бақылау: Оқу-жаттығу өтетін аумақты әуеден үздіксіз қадағалау;

• Геолокациялық құрылғылар: Әрбір қатысушыға нақты орналасқан жерін көрсететін және SOS (құтқару) белгісін қолмен жіберуге мүмкіндік беретін электронды белгі тағу;

• Автоматты дабыл жүйесі: Адам құлап қалса, ұзақ уақыт қимылдамаса немесе суға түскен жағдайда жүйенің өздігінен дабыл жіберуі;

• Медициналық онлайн-бақылау: Әскери қызметкерлердің денсаулық көрсеткіштерін, соның ішінде жүрек соғысын тұрақты бақылап отыру;

• Оперативті штаб пен тоқтату механизмі: Орталық басқару пунктіне ауа райы, желдің жылдамдығы мен теңіз жағдайы туралы деректерді үздіксіз беру. Қауіп деңгейі белгіленген шектен асса, жаттығудың қауіпті кезеңін бірден тоқтату.

Сондай-ақ халық қалаулысы әрбір оқу-жаттығуға қатысушылардың денсаулығын, ықтимал қатерлерді, эвакуация бағыттарын және ауа райы шектеулерін қамтитын жеке қауіпсіздік жоспарын жасауды міндеттеуді сұрады.

Аббат Өрісбаев Үкіметке үш ай мерзім ішінде оқу-жаттығуларға арналған бірыңғай қауіпсіздік стандартын әзірлеп, оны алдымен пилоттық режимде бірнеше өңірде сынақтан өткізуді ұсынды.