Оқу-ағарту министрлігі көктемгі демалыс пен оқу жылының аяқталу мерзімін бекітті

Қазақстан мектептерінде оқу жылындағы ең ұзақ үшінші тоқсан аяқталуға жақын қалды. Оқу жылының ең ауыр кезеңі саналатын бұл тоқсан 19 наурызда мәресіне жетеді. Білім алушылар үшін көктемгі демалыс 20 наурыздан басталып, 29 наурызды қоса алғанда, жалпы саны 11 күнтізбелік күнге созылады.

Бұл демалыс кезеңіне еліміздегі басты мейрамдардың бірі – Наурыз мерекесі де кіреді. Сонымен қатар Халықаралық әйелдер күніне орай мерекелік күндердің ауысуына байланысты мектеп оқушылары 9 наурызда да қосымша демалатын болады.

Көктемнің алғашқы айы басталғанымен, еліміздің бірқатар өңірлерінде әлі де қатты аяз сақталып отыр. Осыған байланысты кейбір мектептерде сабақтар онлайн форматта өткізілуде. Алайда оқушылар үшін маңызды болып табылатын БЖБ (Бөлім бойынша жиынтық бағалау) және ТЖБ (Тоқсандық жиынтық бағалау) жұмыстары мектеп қабырғасында, яғни дәстүрлі форматта орындалуы тиіс.

Жылдың соңғы, төртінші тоқсаны сегіз оқу аптасына созылады. Оқу жылының ресми аяқталуы мен соңғы қоңырау рәсімі дәстүр бойынша 25 мамырға жоспарланған.