Нұрорда мектеп-лицейінің оқушылары пойызға арналған жаңа релстер ойлап тапты

Нұрорда мектеп-лицейінің 11-сынып оқушылары Матай Дінмұхамед пен Жанибек Амир теміржол саласында тың жаңалық ашып, ел назарын өздеріне аударды.

Жас ғалымдар әзірлеген төрт инновациялық шешімге Қазақстанда патент беріліп үлгерді. Енді олардың идеялары халықаралық деңгейге көтерілмек, нақтырақ айтқанда Женевада тіркеуден өтеді. Бұл — жасөспірімдер үшін ғана емес, бүкіл отандық ғылым үшін үлкен жетістік.

Оқушылардың жобалары теміржолдағы шуды айтарлықтай азайтып, рельстердің тозу қарқынын баяулатады және апат қаупін төмендетуге көмектеседі. Сонымен бірге жолдарды күтіп ұстауға кететін шығындарды миллиондаған теңгеге қысқарту әлеуеті бар. Классикалық теміржол түйіспелеріне балама ұсыну арқылы олар бүкіл саланың даму бағытын жаңаша қарауға мүмкіндік беруде.

Бұл идея күтпеген жерден туған. Алматыға робототехника жарысына пойызбен бара жатқанда, дөңгелектер рельс саңылауларына соғылған сайын шыққан қатты дыбыс ұйқы бермей қойған. Сол сәттегі жайсыздық оларды нақты ғылыми мәселеге жетелепті.

Физика пәнінің мұғалімі Арнұр Қазыбеков жетекшілік еткен бір жылдық зерттеу мен тәжірибе нәтижесінде теміржолдағы ең әлсіз тұс болып саналатын түйіспелерді жетілдірудің төрт тиімді әдісі дүниеге келді. Қазірдің өзінде бұл жобаға саланың мамандары қызығушылық танытып отыр.

Дінмұхамед пен Амирдің жетістігі қазақстандық жастардың әлемдік деңгейде жаңалық ашуға қабілетті екенін тағы дәлелдеді. Ақиқатында, ғылымға деген талпыныс пен батыл қадам қай жаста да үлкен нәтижеге жеткізе алады