Нұрай Серікбайдың өлімі: Шымкент полициясына жаңа басшы тағайындалды

Ішкі істер министрі Ержан Сәденов Шымкент қалалық полиция департаментінің жаңа басшысы ретінде Мұхтар Қожаевты таныстырды. Бұл туралы Polisia.kz хабарлады.

Мұхтар Қожаев 2023 жылдың желтоқсанынан бері ІІМ-нің тергеу департаментін басқарған. Полиция генерал-майоры басқарушылық әрі тергеу саласында мол тәжірибеге ие, еңбек жолын тергеушіден бастап министрліктің орталық аппараты деңгейіндегі департамент басшысына дейін өткерген.

Шымкент қалалық полиция департаментінің бұрынғы басшысы Мемлекет басшысының құқық қорғау органдарының әрекеттерін тексеру жөніндегі тапсырмасынан кейін және ІІМ-дегі қызметтік тексеру қорытындысы бойынша қызметінен босатылды. Қызметтік тексеру нәтижесінде басқа да бірқатар қызметкерлерге салғырттық дерегі бойынша қылмыстық іс қозғалды.

Қызметтік тексеру Шымкент қаласының тұрғыны Нұрай Серікбайдың өлімінен кейін басталған. Қайғылы оқиға 11 қаңтарда тіркеліп, бойжеткен көп пышақ жарақатынан көз жұмған. Алдын ала мәліметтерге сәйкес, күдікті қылмысқа дейін марқұмды қорқытып, соңына түскен. Нұрай Серікбайдың ата-анасы полицияға бірнеше рет жүгінгенімен, сол кезде қылмыстық іс қозғалмағаны хабарланған.

Еске салайық, аталған дерек бойынша тергеу амалдары жалғасып жатыр.