Нұралхан Көшеров шетелдік инвесторлармен кездесуде Түркістанның басты экономикалық басымдықтарын атады

Түркістан облысының әкімі Нұралхан Көшеров өңірге келген шетелдік инвесторларды қабылдап, ресми келіссөздер өткізді. Кездесу барысында аймақ басшысы қонақтарды облыстың инвестициялық әлеуетімен таныстырып, өзара тиімді серіктестікті дамытуға шақырды, деп хабарлайды Түркістан облысының әкімдігі.

Өз сөзінде өңір басшысы Түркістан облысының еліміздегі ең серпінді дамып келе жатқан аймақтардың бірі екенін және оның тиімді географиялық орналасуы стратегиялық маңыздылығын арттыра түсетінін атап өтті. Қазақстан мен Қытай арасындағы қарым-қатынастар екі мемлекет басшылары белгілеген достық пен стратегиялық серіктестік қағидаттары негізінде дамып келеді. Түркістан облысы – ауыл шаруашылығы жоғары деңгейде дамыған, оның ішінде мақта шаруашылығы экономиканың негізгі өзегі саналатын өңір.

Жеңіл өнеркәсіпті дамыту мақсатында 2025 жылдың қорытындысы бойынша аймақта жалпы құны 100,1 миллиард теңгені құрайтын инвестициялық жобалар іске қосылды. Атап айтқанда, жіп иіру фабрикасы, екі мақта өңдеу зауыты, сондай-ақ ПВХ құбырлары мен тамшылатып суару жүйелерін шығаратын кәсіпорындар жұмысын бастады. Жаңа технологияларды қолдану арқылы 32 мың гектар аумаққа мақта егіліп, отандық өндіріске елеулі серпін берілді. Қазіргі уақытта инвесторлар үшін қолайлы жағдай жасау мақсатында «TURAN» арнайы экономикалық аймағы, дайын инфрақұрылымы бар индустриалды аймақтар мен кіші өндірістік парктер тиімді жұмыс істеп тұр.

Өз кезегінде инвесторлар аймақта тоқыма өнеркәсібін дамытуға ниетті екендіктерін білдірді. Олар тоқыма маталарын өндіру және бояу, матаны әрлеу, киім тігу, үй тоқымасы мен медициналық қорғаныс құралдарын шығару бағытындағы жобаларды жүзеге асыруға дайын екендіктерін мәлімдеді. Сонымен қатар интеллектуалды әрі экологиялық таза тоқыма өндірісін дамыту және энергия мен жылумен жабдықтау қызметтерін ұйымдастыру жоспарлануда. Аталған бастамалар сәтті жүзеге асқан жағдайда өңірде 500-ден 700-ге дейін жаңа жұмыс орны ашылады деп күтілуде.

Кездесу қорытындысы бойынша тараптар ұсынылған жобаларды егжей-тегжейлі зерделеп, тығыз серіктестік орнатуға уағдаласты.